समाचारहरू

१५ वर्षीया बालिकालाई बाल विवाह गरेको कसुरमा चामुण्डाबिन्द्रासैनी नगरपालिका–३ चाल्नेका २३ वर्षीय भक्तिराम कँडेललाई दैलेख जिल्ला अदालतले ६ महिना कैद र ५ हजार रूपियाँ जरिवाना गरेको छ ।

बालिकााई ०७८ कात्तिक २६ गते सुर्खेतबाट प्रलोभनमा पारेर विवाह गरेको भन्दै पीडित पक्षको उजुरीका आधारमा उक्त फैसला भएको दैलेख जिल्ला अदालतका श्रेस्तेदार उपसचिव इन्द्रबहादुर कार्कीले जानकारी दिनुभयो ।

जिल्ला न्यायाधीश दण्डपाणी लामिछानेको इजलासबाट भएको उक्त फैसलामा उनी आफै अन्जान भएको कारण सुध्रिने मौकासहित बालिकालाई तीन महिना कैद र २५ सय रूपियाँ जरिवाना तोकिए पनि सजाय स्थघन गरेर अविभावकसँग बस्न पाउने फैसला भएको श्रेस्तेदार कार्कीले बताउनुभयो ।

बाल विवाह भएको एक सातामा बालिकाका आफन्तले मङ्सिर २ गते जिल्ला प्रहरी कार्यालय दैलेखमा दिएको उजुरीपछि प्रहरीले गरेको अनुसन्धानका आधारमा जिल्ला सरकारी वकील कार्यालयले मङ्सिर २३ गते दैलेख जिल्ला अदालतमा बाल विवाह कसुरमा अभियोग पेश गरेको थियो ।

अभियोग सम्वन्धमा मङ्सिर २७ गते बसेको बाल इजलासमा भएको थुनछेक बहसपछि न्यायाधीश लामिछानेले सो फैसला गर्नुभएको हो ।

अमर सुनार