समाचारहरू

तनहुँ जिल्ला अदालतमा बाल इजलास नहुँदा बालबालिका सम्बन्धी मुद्दामा न्याय सम्पादनमा अप्ठ्यारो परेको छ । बाल इजलास नहुँदा कहिले बैठक कक्षमा, कहिले न्यायाधीशको चेम्बरमा त कहिले कता राखेर इजलास चलाउनु परेको तनहुँ जिल्ला अदालतका न्यायाधीश कमलराज बिष्टले बताउनु भयो ।

बाल इजलासमा मुद्दाको बहस भइरहँदा आरोपितलाई इजलासमा राख्न नपाइने हुँदा सो क्रममा आरोपितलाई राख्ने स्थानको पनि अभाव भएको न्यायाधीश बिष्टले बताउनु भयो । अदालतको भवन साँघुरो र कोठाको अभाव भएको कारण बाल इजलास चलाउन समस्या परेको जिल्ला अदालतका श्रेस्तेदार केशव पौडेलले बताउनु भयो ।

तनहुँ जिल्ला अदालतमा आर्थिक वर्ष ०८०/८१ मा बालबालिका प्रतिवादी भएको मुद्दा ७५ थान दर्ता भएकोमा ६१ ओटा मुद्दा फैसला भई १४ ओटा मुद्दा बाँकी रहेको स्रेस्तेदार पौडेलले बताउनु भयो ।

प्रकाशचन्द्र भट्टराई