समाचारहरू

स्थानीय तह निर्वाचनका लागि काठमाडौँ जिल्लामा बाल अधिकार अनुगमन जिल्ला समिति गठन गरिएको छ । जिल्ला बाल कल्याण समितिका अध्यक्ष तथा प्रमुख जिल्ला अधिकारी हिमनाथ दवाडीको अध्यक्षतामा वैशाख ६ गते बसेको बैठकले सो समिति गठन गरेको हो ।

जिल्ला बालकल्याण समिति, जिल्ला समन्वय समिति, काठमाडौँ महानगरपालिका, अनौपचारिक क्षेत्र सेवा केन्द्र (इन्सेक) र सिविनका प्रतिनिधि रहने गरी पाँच सदस्यीय जिल्ला बालअधिकार अनुगमन समिति गठन गर्ने निर्णय भएको हो । बैठकले समितिको फोकल पर्सन जिल्ला बालकल्यण समितिकी देवकी आचार्यलाई चयन गर्ने निर्णय समेत गरेको छ ।

बैठकमा जिल्ला बालकल्याण समितिका अध्यक्ष तथा प्रमुख जिल्ला अधिकारी दवाडीले स्थानीय तहको निर्वाचनमा बालबालिकालाई जोखिमका कार्यमा प्रयोग गर्न सक्ने भएकोले सो कार्यको अनुगमन गर्नु पर्ने बताए ।

निर्वाचनका क्रममा बालबालिकालाई बढी प्रयोग गर्न सक्ने हुनाले बालबालिकाको अधिकारका लागि सबैले सहकार्य गरेर अनुगमन गर्नु पर्नेमा उनले जोड दिए ।

बालकल्याण अधिकारी एवम् महिला विकास अधिकृत काठमाडौँकी प्रमुख अनिता अधिकारीले स्थानीय तह निर्वाचनका क्रममा पर्चा-पम्पलेट टाँस्न, र्‍याली, जुलुसलगायतमा बालबालिकाको प्रयोग हुन सक्ने हुनाले त्यसको प्रभावकारी अनुगमन आवश्यक रहेकोले जिल्ला स्तरीय बाल अधिकार अनुगमन समिति गठन गर्नु परेको बताइन् ।

यसैबीच सो बैठक तथा छलफल कार्यक्रममा जिल्ला बाल कल्याण समितिका अध्यक्ष तथा प्रमुख जिल्ला अधिकारी दवाडीले काठमाडौँका बालबालिकाको स्थिति प्रतिवेदन-२०७३ सार्वजनिक गरे ।

प्रतिवेदनमा ०७२ वैशाख १२, १३ र २९ गते गएका विनाशकारी भूकम्पका कारण काठमाडौँ जिल्लामा ३ सय २० जना बालबालिकाको ज्यान गएको उल्लेख छ । भूकम्पका कारण १ हजार ९६ जना बालबालिका घाइते भएको प्रतिवेदनमा उल्लेख छ ।

इन्सेक क्षेत्रीय कार्यालय, काठमाडौँ