समाचारहरू

सम्वर्द्धन बाल अधिकारको, कार्यान्वयन संविधानको भन्ने नाराका साथ मङ्सिर ५ गते सप्तरीमा अन्तर्राष्ट्रिय बालअधिकार दिवस मनाइएको छ ।

जिल्ला बाल क्लब सञ्जालको आयोजनामा राजविराजमा प्रभातफेरी गरी जिल्ला विकास समितिको सभाकक्षमा पुरस्कार वितरणलगायतका कार्यक्रम सम्पन्न गरिएको छ । कार्यक्रममा बालिका दौड प्रतियोगिता, निबन्ध प्रतियोगिता, नाटक प्रतियोगिताका विजेता, उपविजेताहरूलाई पुरस्कार वितरण गरिएको छ ।

बालश्रम, बालविवाह, बालबालिकाविरूद्ध हुने हिंसा, दुर्व्यवहार, सजाय, जोखिम काममा बालबालिकाको प्रयोग लगायतका समस्या समाधानको लागि अहिलेको नीति, कार्यक्रम तथा योजनाको प्रभावकारी कार्यान्वयनमा सञ्जालका अध्यक्ष अमर यादव, सञ्जालका राष्ट्रिय अध्यक्ष सुरेश गुप्तालगायतका बालबालिकाहरूले जोड दिए ।

संयुक्त राष्ट्रसङ्घको महासभाले सन् १९८९ नोभेम्बर २० तारिखका दिन बालबालिकासम्बन्धी अन्तर्राष्ट्रिय महासन्धि पारित गरेको दिनको सम्झनामा यो दिवस मनाउन थालिएको हो । नेपालले यो महासन्धिलाई सन् १९९० सेप्टेम्बर १४ का दिन हस्ताक्षर गरी अनुमोदन गरेको हो ।

मनोहरकुमार पोखरेल