समाचारहरू

लाम्रा गाविस–७ धौलापानीगाउँकी १७ वर्षीया मन्नु न्यौपानेको हत्या गरेको आरोपमा दैलेख जिल्ला तोलीजैसी गाविस–५ का २३ वर्षीय केशव शाहीलाई प्रहरीले ०७३ भदौ ३० गते गिरफ्तार गरेको छ ।

पीडित मन्नुलाई शाहीलगायत पाँच जना बालबालिकाले हत्या गरेको भन्दै मृतकका आफन्तले भदौ ३० गते जिल्ला प्रहरी कार्यालय, जुम्लामा किटानी जाहेरी दिएका छन् ।

पीडित पक्षको जाहेरीपछि केशव शाहीलाई अनुसन्धानका लागि गिरफ्तार गरिएको जिल्ला प्रहरी कार्यालय जुम्लाका इन्स्पेक्टर दिलबहादुर थापामगरले बताए ।

उनले भने–‘हत्या गरेर तिला नदीमा फालेको आशङ्कामा आफन्तद्वारा किटानी जाहेरी दर्ता गरेको र अन्य आरोपितको खोजतलास भइरहेको छ ।’ उक्त घटनाका विषयमा अनुसन्धान भइरहेको जिल्ला प्रहरी कार्यालय जुम्लाले जनाएको छ ।

मृतकका आफन्त आदिप्रसाद न्यौपानेले कामको सिलसिलामा कालिकोट र जुम्ला जिल्लाको सीमानामा पर्ने नाग्मबजारमा गएको अवस्थामा भदौ १९ गते मन्नुको हत्या गरी तिला नदीमा लास फालेको आरोप लगाए । याे समाचार तयार पार्दासम्म पनि लास नभेटिएको मृतकका आफन्त आदिप्रसादले जानकारी दिए ।

मानदत्त रावल