समाचारहरू

रङ्गेली नगरपालिका‒२ की २१ महिनाकी युनिसा उराउको हत्या गरेको आरोपमा प्रहरीले रङ्गेली नगरपालिका‒२ का ४६ वर्षीय सैनी उराउ र ३५ वर्षीया सङ्गीतालाई गिरफ्तार गरेको छ ।

बालिकालाई आरोपितद्धयले हत्या गरी रङ्गेली नगरपालिका‒२ मा पैनीमा गाडिएको अवस्थामा पुस ३ गते बालिकाको शव भेटिएपछि अनुसन्धानका लागि नाताले फुपु र भिनाजु पर्ने आरोपितद्धयलाई गिरफ्तार गरेको इलाका प्रहरी कार्यालय रङ्गेलीका असई धिरेशकुमार मण्डलले इन्सेक प्रतिनिधिसँगको फोन सम्पर्कमा बताउनु भयो ।

मङ्सिर २६ गते घरबाट हराएकी बालिकाको शव मङ्सिर २८ गते पैनीमा गाडिएको अवस्थामा फेला परेपछि फुपु र भिनाजुलाई गिरफ्तार गरेको मण्डलले बताउनु भयो ।

मङ्सिर २६ गते घरबाट हराएकी छोरीको विषयमा सोही दिन इलाका प्रहरी कार्यालय रङ्गेलीमा खबर गरेको मृतकका बाबु चन्द्र उराउले बताउनु भयो ।

बालिका धेरै रोएकाले चुप लगाउन हिर्काउँदा भर्याङ्गबाट खसेर बालिकाको मृत्यु भएपछि लास पैनीमा गाडेको आरोपितले प्रारम्भिक अनुसन्धानमा बताएको प्रहरीले जनाएको छ ।

आरोपितविरूद्ध प्रहरीले जिल्ला अदालतमा पुस ४ गते कर्तव्य ज्यान शीर्षकमा मुद्दा दर्ता गरी कारबाही अघि बढाएको छ ।

शवको पोष्टमार्टम कोशी अस्पतालमा मङ्सिर २९ गते गरिएको छ । पीडित पक्षले सोही दिन शव बुझी नगरपालिका‒२ स्थित कसेनी नहरमा सद्गत गरेको छ ।

अर्जुन दर्जी