समाचारहरू

कानेपोखरी गाउँपालिका–३ की १६ वर्षीया बालिका पुतली खड्काको हत्या गरेको आरोपमा पीडित पक्षले तीन जना विरूद्ध प्रहरीमा किटानी उजुरी दिएको छ ।

बालिकालाई ०७८ वैशाख २२ गते हत्या गरेको आरोपमा पीडित पक्षले कानेपोखरी गाउँपालिका–३ का ४५ वर्षीय प्रकाश खड्का, ४० वर्षीय प्रकाश खवास र ३५ वर्षीया सञ्जु खवासविरूद्ध इलाका प्रहरी कार्यालय पथरीमा उजुरी दिएको जिल्ला प्रहरी कार्यालयका डिएसपी मानबहादुर राईले इन्सेक प्रतिनिधिसँगको फोन सम्पर्कमा बताउनु भयो ।

घटनाका आरोपित  प्रकाश खड्काको घरमा घरेलु कामदारका रूपमा कार्यरत बालिकाको घरधनीकै खेतमा वैशाख २२ गते शव फेला परेको थियो ।

आरोपितहरूले हत्या गरेर खेतमा फालेको आरोपमा पीडित पक्षले आरोपितविरूद्ध प्रहरीमा उजुरी दिएको डिएसपी राईले बताउनु भयो ।

शवको भिसेरा परीक्षणको लागि प्रहरीको विधि विज्ञान प्रयोगशाला काठमाडौं पठाएको र रिपोर्ट आएपछि मात्र वास्तविक पत्ता लाग्ने डिएसपी राईले बताउनु भयो ।

शवको पोष्टमार्टम वैशाख २३ गते कोशी अस्पतालमा गरिएको छ ।

पीडित परिवारले सोही दिन डाँस खोलामा दाहसंस्कार गरेको इलाका प्रहरी कार्यालय पथरीका डिएसपी कृष्ण खड्काले बताउनु भएको छ ।

नेत्रप्रसाद अधिकारी