बालिका हत्या आरोपमा गिरफ्तार

  ०७९ माघ ६ गते

हलेसी तुवाचुङ नगरपालिका–७ महादेवस्थान काभ्रेकी १७ वर्षीया बालिका रञ्जीता दाहालको हत्या आरोपमा प्रहरीले रावावेशी गाउँपालिका–५ का २५ वर्षीय अनन्त विकलाई माघ ६ गते गिरफ्तार गरेको छ ।

पीडित बालिका माघ १ गते विद्यालयबाट घर फर्किने क्रममा बेपत्ता भएकी थिइन् । माघ २ गते बालिकाको लास घर नजिक खन्यूको बोटमा पाँसो लगाएको चुडिँएर जमिनमा बजारिएको जस्तो अवस्थामा भेटिएको थियो ।

महेन्द्र माध्यमिक विद्यालय हलेसीमा कक्षा–१० मा अध्ययनरत बालिकाको घटनास्थल मुचुल्काका आधारमा आत्महत्या नभई शङ्कास्पद घटना भएकाले पीडितका ४४ वर्षीय  रामकुमार दाहालले आरोपितविरूद्ध माघ ३ गते जिल्ला प्रहरी कार्यालयमा उजुरी दिएका थिए ।

पीडित पक्षको उजुरीका आधारमा आरोपितलाई अनुसन्धानका लागि माघ ६ गते घरबाटै गिरफ्तार गरेको जिल्ला प्रहरी कार्यालयका डिएसपी मञ्जील मुकारुङले बताउनु भयो ।

शवको पोष्टमार्टम माघ ३ गते जिल्ला अस्पतालमा गरिएको छ ।

सोही दिन शव बुझी दिक्तेल रूपाकोट मझुवागढी नगरपालिका–१ स्थित मेवा खोलामा सद्गत गरेको पीडितका बाबु  रामकुमार दाहालले बताउनु भएको छ ।


तारानाथ फुयल