बालिका र महिला कुटपिट घटनाको छानविनका लागि तीन सदस्यीय समिती गठन

  ०७९ असार १ गते

तुलसीपुर उप–महानगरपालिका– ५ आलुमण्डीस्थित एकराज बस्नेतको घरमा प्रवेश गरी बस्नेतकी पत्नी २७ वर्षीया मीना भण्डारी बस्नेत र पाँच वर्षीया छोरी एन्जिला बस्नेतलाई लुम्बिनी प्रदेशकी स्वास्थ्य, जनसंख्या तथा परिवार कल्याण राज्यमन्त्री विमला खत्री वलीले कुटपिट गरेको घटनाको छानविन गर्न असार १ गते तीन सदस्यीय छानविन समिती गठन गरेको छ ।

लुम्बिनी प्रदेशमा असार १ गते बसेको मन्त्री परिषदको बैठकले राज्यमन्त्री विमला वलीको घटनाबारे छानविन गर्नका लागि लुम्बिनी प्रदेशका आन्तरीक मामिला तथा सञ्चारमन्त्री तिलकराम शर्माको संयोजकत्वमा महिला बालबालबालिका, कानुन तथा ज्येष्ठ नागरिक मन्त्री रमा घर्ती मगर, प्रदेशका मुख्य न्यायधिवक्ता श्रीकृष्ण सुवेदी रहने निर्णय गरेको प्रदेश सरकारका प्रवक्ता तिलकराम शर्माले बताउनु भयो ।

आरोपित वली जेठ ३१ गते अंग रक्षकसहित झण्डावाल गाडीमा बस्नेतको घरमा पुगेर कुटपिट गरेको आरोपमा प्रहरीले सोही दिन गिरफ्तार गरेको थियो ।

जिल्ला प्रहरी कार्यालयमा रहेकी वलीलाई मानसिक पीडा भएर एक्कासी बेहोस भएको अवस्थामा जेठ ३१ गते राति उपचारका लागि लुम्बिनी प्रादेशिक अस्पताल बुटवलमा भर्ना गरिएको मुख्यमन्त्रीका प्रेस सल्लाहकार मानसिंह बिकले प्रेस विज्ञप्तिमार्फत जानकारी दिनु ऐएको छ ।

मीना बस्नेतले राज्यमन्त्री वलीविरूद्ध जेठ ३१ गते इलाका प्रहरी कार्यालय तुल्सीपुरमा उजुरी दिनुभएको थियो ।


रीमा बिसी