समाचारहरू

लिखु गाउँपालिका–३ सूर्यमतिका पाँच जना बालिकाहरूलाई विक्रीको लागि सुर्खेत पुर्‍याएको आरोपमा प्रहरीले लिखु गाउँपालिका–४ चौघडाका २४ वर्षीय विकाश प्याकुरेल र १६ वर्षीय बालकलाई गिरफ्तार गरी मानव बेचबिखन तथा ओसारपसार ऐन अन्तर्गत कात्तिक २५ गते मुद्दा दायर गरेको छ । प्रहरीले बालकलाई कात्तिक २४ गते र प्याकुरेललाई कात्तिक २५ गते गिरफ्तार गरेको हो ।

जिल्ला प्रहरी कार्यालयका अनुसार आरोपितद्वयले तिहारको भैली खेल्न निस्केका १३ देखि १६ वर्ष उमेरका पाँच जना बालिकालाई कात्तिक २१ गते राति ललाइफकाई सुर्खेत पुर्‍याएका थिए ।

परिवारको मौखिक उजुरीका आधारमा खोलतलास गर्दा कात्तिक २४ गते सुर्खेत जिल्ला भेरीगङ्गा नपा–१२ छिन्चुका निर्मल विकको घरबाट बालिकाहरूलाई उद्धार गरी नुवाकोट ल्याएको जिल्ला प्रहरी कार्यालयका इन्स्पेक्टर राजाराम खड्काले बताए ।

उद्धार गरिएका बालिकाहरूलाई जिल्ला प्रहरीको महिला तथा बालिका सेवा केन्द्रको आश्रयमा राखिएको छ । घटनाको अनुसन्धान भइरहेको प्रहरीले जनाएको छ ।

नवदीप श्रेष्ठ