बालिका बलात्कार घटनाका आरोपित विरुद्ध मुद्दा दर्ता

एक १४ वर्षीया बालिकालाई बलात्कार गरेको आरोपमा मङ्सिर २१ गते याङनाम गाविस-६ का २२ वर्षीय बुद्धि केरुङ विरुद्ध जिल्ला प्रहरी कार्यालयमा उजुरी दर्ता भएको छ । पीडितले भदौ १४ गते आफू बाटोमा एक्लै भएको बेला ललाई-फकाई बलात्कार गरेको भनि आरोपित विरुद्ध उजुरी दिएकी हुन् ।

पीडित पक्षको उजुरी पश्चात आरोपितलाई मङ्सिर २० गते गिरफ्तार गरिएको र पीडितका स्वास्थ्य परीक्षण पनि सोही दिन भएको जिल्ला प्रहरी कार्यालयमा इन्स्पेक्टर विजय श्रेष्ठले बताए ।

यसैगरी धनकुटा प्रतिनिधि सन्तोष रुचालका अनुसार ५५ वर्षीया एकल महिलालाई मङ्सिर १८ गते बलात्कार गरेको आरोपमा ताङ्खुवा गाविस-२ का २२ वर्षीय युवक रबिन लिम्बु विरुद्ध प्रहरीले मङ्सिर २२ गते मुद्दा दायर गरेको छ ।

पीडितले मङ्सिर २१ गते जिल्ला प्रहरी कार्यालयमा दिएको किटानी जाहेरीको आधारमा आरोपितलाई सोही दिन घरैबाट गिरफ्तार गरी आरोपित विरुद्ध जबरजस्ती करणी अन्तर्गतको मुद्दा जिल्ला अदालतमा दायर गरिएको जिल्ला प्रहरी कार्यालयका सई दिनेश अधिकारीले बताए । घटनाको आवश्यक अनुसन्धानको लागि अदालतबाट सात दिनको म्याद थप गरिएको छ । पीडितको मङ्सिर २१ गते जिल्ला अस्पतालमा स्वास्थ्य परीक्षण गरिएको थियो ।


सन्तोष रुचाल