समाचारहरू

१४ वर्षीया बालिका बलात्कारको घटनामा साढे ४ वर्षदेखि फरार रहेका आरोपित शम्भुनाथ नगरपालिका–७ का ३५ वर्षीय दर्शन भनिने दशन मण्डल चैत १ गते जिल्ला अदालतमा हाजिर भएका छन् ।

बलात्कार गरेको आरोपमा इलाका प्रहरी कार्यालय कल्याणपुरले आरोपित विरुद्ध ०७५ पुस २६ गते उजुरी दर्ता गरेको थियो । बलात्कारका आरोपित मण्डल भारततर्फ फरार भएको र गिरफ्तार नभएको अवस्थामा अदालतले ०७६ असार ३० गते मुल्तबीमा राख्ने फैसला गरेको थियो ।

आरोपितले ०७५ साउन ५ गतेदेखि पटक–पटक बलात्कार गरेको भन्दै पीडितले अभिभावकलाई ०७५ पुस १६ गते बताउनु भएको थियो । बालिकाको पेट ठूलो हुँदै गएपछि चिकित्सक कहाँ चेकजाँच गर्दा गर्भवती भएको थाहा पाएपछि सोधपुछ गर्दा मात्र घटनाबारे जानकारी पाएको पीडितका अभिभावकहरूले बताएका छन् ।

बाख्रा चराउन जाने गरेकी बालिकालाई ललाईफकाई आरोपितले पटक–पटक बलात्कार गरेको भन्दै पीडितका बुबाले इलाका प्रहरी कार्यालय कडरबोनामा ०७५ पुस २६ गते उजुरी दिनुभएको थियो । पीडितको स्वास्थ्य परिक्षण राजविराजस्थित गजेन्द्रनारायण सिंह अस्पतालमा ०७५ पुस २६ गते भएको थियो । अस्पतालका चिकित्सकका अनुसार ०७५ पुस २७ गते भिडिओ एक्सरे गराउँदा पीडित बालिका २८ हप्ता तीन दिनकी गर्भवती थिइन् ।

अदालतमा हाजिर भई निवेदन दिई मुल्तबीबाट मुद्दा जगाएका आरोपित जिल्ला न्यायाधीश हरिश्चन्द्र इङ्गनामको इजलाशले पुर्पक्षका लागि चैत १ देखि राजविराज कारागारमा थुनामा पुगेका छन् ।

मनोहरकुमार पोखरेल