समाचारहरू

उर्लावारी नगरपालिका-६ की ११ वर्षीया बालिका आयुसा राईलाई कुटपिट गरेको आरोपमा प्रहरीले सुनसरी जिल्ला, धरान उपमहानगरपालिका-११ स्थायी घर भइ उर्लावारी नगरपालिका-६ मा बस्दै आएका २६ वर्षीय मिशन भनिने रूद्रबहादुर राईलाई जेठ १३ गते गिरफ्तार गरेको छ ।

१ हजार ४ सय रुपियाँ चोरी गरेको आरोपमा बालिकालाई ०८१ जेठ १२ गते आरोपितले निर्घात कुटपिट गरेको इलाका प्रहरी कार्यालय, उर्लावारीका इन्स्पेक्टर देवेन्द्र दासले बताउनु भयो । कुटपिटबाट बालिकाको शरीरका विभिन्न भाग र अनुहारमा चोट लागेको छ ।

पीडित बालिकाको मङ्गलवारेस्थित मदन भण्डारी अस्पताल तथा ट्रमा सेण्टरमा उपचार भइरहेको इन्स्पेक्टर दासले बताउनु भयो ।

उर्लावारी नगरपालिका-६ स्थित राधिका माध्यमिक विद्यालयमा कक्षा ५ मा अध्ययनरत बालिका जेठ १३ गते मास्क लगाएर आएको अवस्थामा सोधीखोजी गरेपछि मिशनले कुटपिट गरेको बालिकाले बताएको विद्यालयका प्रधानाध्यापक कुमार पोखरेलले बताउनु भयो ।

नेपालको संविधानले धारा ३८ मा बालबालिकाको हकलाई मौलिक हकका रूपमा व्यवस्था गरेको छ ।

सोही धाराको उपधारा ७ मा कुनै पनि बालबालिकालाई घर, विद्यालय वा अन्य जुनसुकै स्थान र अवस्थामा शारिरीक, मानसिक वा अन्य कुनै किसिमको यातना दिन पाइने छैन भनि उल्लेख गरिएको छ ।

विनोद सुवेदी