समाचारहरू

दुहवी नगरपालिका-१० डुम्राहास्थित मामाघरमा खेलिरहेकी ६ वर्षीया बालिकालाई अपहरण गरेको आरोपमा प्रहरीले तीन जनालाई साउन १६ गते गिरफ्तार गरेको छ ।

मामाघरमा खेलिरहेकी बालिकालाई ०८१ साउन १५ गते अपहरण गरेको आरोपमा प्रहरीले साउन १६ गते विराटनगर महानगरपालिका-६ का ५० वर्षीय सञ्जय पासवान, ५० वर्षीय कलानन्द पासवान र ४० वर्षीया सरिता पासवानलाई गिरफ्तार गरेको हो ।

सञ्जयले बालिकालाई अपहरण गरी विराटनगर महानगरपालिका-१० स्थित मानव सेवा आश्रम अगाडिको डेरामा राखेको अवस्थामा प्रहरीले साउन १६ गते बालिकाको उद्दार गरेको छ ।

डेरामा बालिकालाई बन्धक बनाएको अवस्थामा उद्दार गरिएको र मुख्य आरोपित सञ्जयसहित उनका सहयोगी कलानन्द र सरिता पासवानलाई अनुसन्धानका लागि गिरफ्तार गरिएको जिल्ला प्रहरी कार्यालय, सुनसरीका डिएसपी नवीनकृष्ण भण्डारीले बताउनु भयो ।

अपहरणमा परेकी बालिकाकी ठूली आमासँग सञ्जयको प्रेम सम्बन्ध रहेको र सम्बन्धमा खटपट आएपछि प्रतिशोध साँध्न बालिकाको अपहरण गरेको प्रारम्भिक अनुसन्धानबाट खुलेको डिएसपी भण्डारीले बताउनु भयो ।

बालिका हराएको सूचना पीडित परिवारले दिएपछि जिल्ला प्रहरी कार्यालय सुनसरी, जिल्ला प्रहरी कार्यालय, मोरङ र प्रदेश प्रहरी कार्यालयले संयुक्त रूपमा बालिकाको खोजी थालेको थियो ।

पीडित बालिकाको स्वास्थ्य परीक्षण जिल्ला अस्पताल, इनरूवामा साउन १६ गते गरिएको छ ।

जयकृष्ण यादव