समाचारहरू

१४ वर्षीया बालिकालाई चैत १७ गते मानव अधिकारकर्मीहरूको पहलमा आफन्तको घरबाट उद्धार गरी पुनर्स्थापना केन्द्रमा पठाइएको छ ।

जिल्ला बालकल्याण समिति, अनौपचारिक क्षेत्र सेवा केन्द्र (इन्सेक), पोखरा-लेखनाथ नगरपालिका, पोखरा उद्योग वाणिज्य सङ्घ, थ्री एञ्जल र जिल्ला प्रहरी कार्यलयको संयुक्त टोलीले बालिकालाई उद्धार गरेको हो ।

बालिकालाइ यौन व्यवसायमा लगाएको र आफन्तको घरमा जोखिममा रहेको भन्ने पीडित पक्षले जिल्ला प्रहरी कार्यलयमा सूचना दिएपछि सोको आधारमा बालिकाको उद्धार गरिएको केन्द्रीय बाल कल्याण समितिका श्रोत व्यक्ति बद्री वाग्लेले जानकारी दिए ।

वाग्लेका अनुसार २० वर्षभन्दा कम उमेरका बालिकालाई उसको अनुमति भएपनि यौन व्यवसायमा लगाउन नपाइने भएका कारण बालिकालाई उद्धार गरिएको हो ।

साथै, प्रहरीले घटनास्थलबाट पीडित बालिकाकी सानिमा र पोखरा-लेखनाथ मनपा-१३ का ३० वर्षीय लक्ष्क्षु पासवानलाई समेत जिल्ला प्रहरी कार्यलय, कास्कीले गिरफ्तार गरेको छ ।

आरोपित दुवैलाई गिरफ्तार गरी अनुसन्धान प्रक्रिया अगाडि बढाएको महिला तथा बालबालिका सेवा केन्द्रकी प्रमुख चन्द्रा गुरुङले बताइन् ।

सङ्गीता भाट