समाचारहरू

घरमा सुतिरहेकी मर्यादपुर गाविस-१ की ६ वर्षीया शिला कुमारीलाई अपहरण गरी बलात्कार पश्चात हत्या गरेको आरोपमा कटहरीया गाविस-१ हर्षाहा टोलका २८ वर्षीय बालकिशोर चौरसियालाई जिल्ला प्रहरी कार्यालय रौतहटले गिरफ्तार गरी भदौ १० गते सार्वजनिक गरेको छ ।

पीडित बालिकालाई ०७३ भदौ ८ गते राति घरमा सुतिरहेको बेला अपहरण गरी बलात्कार प्रश्चात हत्या गरेको आरोपमा प्रहरीले उनलाई गिरफ्तार गरी आज पत्रकार सम्मेलनमार्फत सार्वजनिक गरेको हो ।

बालिकालाई अपहरण गरेको घटनामा खोजतलासको क्रममा प्रहरीले प्रमाणसहित आरोपित चौरसियालाई भदौ ८ गते राति नै गिरफ्तार गरेको प्रहरीले जनाएको छ ।

आरोपित चौरसियाले प्रहरीलाई दिएको बयानमा अपहरित बालिकालाई उनले सुतेको स्थानबाट अपहरण गरी एकान्त स्थानमा ल्याई बलात्कार गरेको र बलात्कार पश्चात बालिकाको हात खुट्टा भाँची जिउँदै नजिकै रहेको लाल बकैया नदीको पुलबाट खोलामा फालिदिएको स्वीकार गरेको जिल्ला प्रहरी कार्यालय रौतहटका एसपी डा. गणेश रेग्मीले बताए ।

अपहरित बालिकाको शव प्रहरीले भदौ ९ गते इनर्वा गाविस-१ स्थित लाल बकैया नदीको किनारामा फेला पारेको थियो । शवको पोष्टमार्टम जिल्ला अस्पतालमा सोही दिन गरिएको प्रहरीले जनाएको छ ।

विपिन गौतम