समाचारहरू

१५ वर्षीया बालिकाको नीलकण्ठ नपा-८ बगैँचाका २२ वर्षीय राज नेपालसँग वैशाख ७ गते भइरहेको विवाह मण्डपबाटै पौरखी महिला सहकारी जोगिमाराको पहलमा उद्धार गरिएको छ ।

गाउँमा बालिकाको विवाह हुँदै गरेको भन्ने सूचना पाएपछि प्रहरी चौकी जोगिमाराको सहयोगमा सहकारीमा आबद्ध महिलाहरूले बालिकाको उद्धार गरी जिल्ला बालकल्याण समितिमा बुझाइएको पौरखी महिला सहकारीकी हरिमायाँ ठकुरीले जानकारी दिएकी छन् ।

उद्धारपछि सदरमुकाम ल्याइएकी बालिकालाई बालगृहमा राखिएको जिल्ला बालकल्याण समिति धादिङका अधिकृत हरि उप्रेतीले जानकारी दिए ।

बालिकाको परिवारलाई २० वर्ष नपुगी विवाह गर्न नहुने भन्दै सम्झाइएको र विवाह गर्न गएका केटा पक्षलाई पनि बालविवाह गर्न नहुने विषयमा जानकारी गराएर पठाइएको प्रहरीले जनायो ।

सीताराम अधिकारी