समाचारहरू

उमेर नै नपुगी अविभावकले विवाह गरिदिन लागेपछि उदयपुरकी १६ वर्षीया एक बालिकाको विवाह रोक्न बाल क्लब सञ्जालले मङ्सिर २६ गते स्थानीय प्रशासनसँग माग गरेको छ ।

त्रियुगा नगर स्तरीय बाल क्लब सञ्जालले प्रमुख जिल्ला अधिकारीलाई सम्बोधन गरी पत्रमार्फत विवाह रोक्न माग गरेको हो । बालिकाको विवाह मङ्सिर २७ गते झापाको एक जना केटासँग गर्ने तय भएकोले रोक्न माग गरिएको बाल क्लब सञ्जालका भुवन दाहालले जानकारी दिए ।

बालिकाको बुवाले जबरजस्ती विवाह गरिदिन लागेकाले विवाह रोक्न पत्रमार्फत प्रमुख जिल्ला अधिकारीसँग माग गरिएको सञ्जालका सचिव प्रदिता पोखरेलले बताइन् । उनले भनिन्-'हामीले घर परिवारलाई गएर कम उमेरमा विवाह नगरिदिनु भनेर सम्झायौँ । तर, अविभावकले नमानेपछि बाध्य भएर प्रशासन गुहार्‍यौँ ।'

बाल क्लब सञ्जालको पत्र अनुसार बालिकाको बावुलाई प्रशासनले विवाह रोक्न निर्देशन दिएको जिल्ला बाल कल्याण समितिका अध्यक्षसमेत रहेका प्रमुख जिल्ला अधिकारी कृष्णचन्द्र घिमिरेले जानकारी दिए ।

उनले भने-'बाल विवाह हुदैँछ भन्ने सूचना आएपछि रोक्न भनेका छौँ । तर, बालिकाको जबरजस्ती विवाह गरे कानुनी कारबाहीसमेत गर्ने बारेमा अविभावकलाई सचेत गराइसकेका छौँ ।'

भरत खड्का