समाचारहरू

१३ वर्षीया बालिकाको सिरहा बरियारपट्टी गाउँपालिका–२ जानकीनगरका २५ वर्षीय मिथलेश रायसँग बालविवाह भएको भन्दै जिल्ला प्रहरी कार्यालयमा जेठ २५ गते उजुरी दर्ता भएको छ ।

छिन्नमस्ता गाउँपालिका–१ बरहीका ४२ वर्षीय राधेश्याम रायले मिथलेश, उनकाबुवा ५५ वर्षीय जिलेश्वर राय, बालिकाकी आमा ४५ वर्षीया रेखादेवी राय, ५५ वर्षीय रविशंकर राय, ४३ वर्षीय मिनादेवी रायका विरुद्ध दिएको उजुरी दर्ता भएको जिल्ला प्रहरी कार्यालयका डिएसपी नरेशकुमार सिंहले बताउनु भयो ।

उजुरीका साथ निवेदकले बालिकाको जन्मदर्ता, विवाहको निमन्त्रण पत्र, विवाहको फोटो र भिडिओ पेश गर्नुभएको छ । स्थानीय पञ्जिका धिकारी कार्यालयको जन्मदर्ता किताबमा बालिकाको जन्म ०६७ भदौ २५ गते उल्लेख छ । छिन्नमस्ता गाउँपालिका–१ बरहीमा वैशाख २८ गते राति बालविवाह भएको थियो ।

बालविवाह हुँदैछ भनी इन्सेक प्रतिनिधिले एसपी नरेन्द्रकुमार कार्कीलाई जानकारी गराए पछि प्रहरी खटिएर विवाहस्थल पुगेपनि बालविवाह नरोकिएको स्थानीयवासी राजु रायले बताएका छन् । बालविवाह रोक्ने प्रयास असफल भएपनि कारवाही गर्न सकिने भन्दै इन्सेक सप्तरी प्रतिनिधिले एसपीकार्की र सिडिओ भूपेन्द्र थापासँग वैशाख २९ गते माँग गर्नुभएको थियो । उजुरी दर्ता भएपनि आरोपितहरू गिरफ्तार भएका छैनन् ।

मनोहरकुमार पोखरेल