बालमैत्री संरचना नबन्दा विद्यालयमा बालबालिकालाई सास्ती

  ०८१ वैशाख १२ गते

सुनछहरी गाउँपालिका-२, झेलगुङमा रहेको जनआवाज आधारभुत विद्यालयमा बालमैत्री संरचना नबन्दा बालबालिकाहरूलाई सास्ती भएको छ ।

उक्त विद्यालयमा कक्षा एकदेखि पाँचसम्मका बालबालिहरूका अध्ययन गर्दै आइरहेका छन् । विद्यालय भवन बालमैत्री नभएपछि विद्यार्थीले जोखिम मोलेर कक्षा कोठामा प्रवेश गर्नुपर्छ । विद्यालयका प्रधानाध्यापक जगेन्द्र बुढामगरका अनुसार विद्यालयको भवन मर्मतका लागि हालसम्म कतैबाट बजेट प्राप्त भएको छैन । उक्त संरचनाको अभावका कारण पठनपाठन प्रभाकारी हुन सकेको छैन । विद्यालयको अवस्था बारे सबैलाई थाहा छ तर कतैबाट बजेट आएको छैन ।

बालमैत्री विद्यालय निर्माण गर्न समय समयमा पहल भए पनि स्थानीय, प्रदेश र सङ्घीय सरकारले चासो नदेखाएको विद्यालयका प्रधानाध्यापक बुढामगरको गुनासो छ । विद्यालयमा शौचालय तथा खानेपानीको सुविधाबाट समेत बालबालिकाहरू वञ्चित हुनुपरेको उहाँले उल्लेख गर्नुभयो । विद्यालय बालमैत्री संरचना बनाउन नसक्दा विद्यार्थीहरूलाई पढ्न समस्या भएको छ । विद्यालयको आगनमै अग्लो ढिक भएकाले आफ्ना साना बालबालिकाहरू कक्षाभित्र प्रवेश गर्दा वा बाहिरिँदा ढिकबाट लड्छनकी भन्ने डर बोकेर विद्यालय पठाउन परेको अभिभावकहरूको गुनासो छ ।

विद्यालय नै जोखिम अवस्थामा भएको कारण पढाइमा झन् बाधा आइपरेको विद्यालय व्यवस्थापन समितिका निवर्तमान अध्यक्ष गणेशकुमार विकले बताउनु भयो । करिब १ सय जना भन्दा बढी विद्यार्थीको भविष्यमाथि खेलबाड गरेजस्तो महसुस गराएको उहाँले उल्लेख गर्नुभयो । विद्यालयको खेलमैदान बनाउदा स्काभेटरले खन्ने क्रममा अग्लो ढिक बनेको र जसले बालकालिकाहरू खेल्न तथा हिँड्डुल गर्न कठिन भएको र साना बालकालिकाहरू खेल्दा अग्लो ढिकबाट लडेर हात खुत्तामा चोट लाग्ने जस्ता समस्या हुने गरेको विद्यालयका प्रधानाध्यापक जगेन्द्र बुढामगरले बताउनु भयो ।

यस विषयमा ०७९ फागुन ३० गते 'विद्यालयमा बालमैत्री संरचना नबन्दा बालबालिकालाई सास्ती' शीर्षकमा इन्सेक अनलाइनमा समाचार समेटिए पनि अवस्था उस्तै रहेको छ ।

नेपालको संविधान २०७२ ले शिक्षाको अधिकारलाई मौलिक अधिकारको रूपमा व्यवस्था गरेको छ । संविधानको धारा ३१ मा प्रत्येक बालबालिकालाई शिक्षामा पहुँचको हक हुने कुरा उल्लेख गरिएको छ । संविधानले दिएको यही मौलिक अधिकार प्राप्त गर्न सुनछहरी गाउँपालिका-२, झेलगुङमा रहेको जनआवाज आधारभुत विद्यालयमा बालमैत्री संरचना नबन्दा बालबालिकाहरूले दिनहुँ सास्ती भोग्नु परेको हो ।


तिलक घर्तिमगर