समाचारहरू

५ वर्षीया बालिकालाई बलात्कार गरेको कसुरमा जिल्ला अदालतले कसुरदार ठहर गरी बाल सुधार गृहमा पठाउने आदेश दिइएका १३ वर्षीय बालकलाई सुधार गृह नपठाई वयस्कहरूसँगै कारागारमा राखेको पाइएको छ ।

पीडित बालिकालाई आरोपितले ०७६ जेठ २९ गते बलात्कार गरेको आरोपमा असार २ गते जिल्ला प्रहरी कार्यालयमा पीडित पक्षले उजुरी दिएको थियो ।

पीडित पक्षको उजुरीका आधारमा असार २ गते गिरफ्तारीमा परेका बालक विरूद्ध प्रहरीले कानुनी कारवाही अघि बढाएकामा जिल्ला अदालतले असार ४ गते कसुरदार ठहर गर्दै ४ वर्षकैद सजाय र पीडितले पाउने गरी २५ हजार रुपियाँ क्षतिपूर्ति भराउने फैसलासहित सुधार गृह पठाउन आदेश दिएको थियो ।

न्यायाधीश कृपाश्वर कार्कीको इजलासले कैद सजाय र क्षतिपूर्तिसहित सुधार गृह पठाउन आदेश दिएपनि बालकलाई जिल्ला कारागारमा वयस्कहरू सँग राखेको पाइएको अदालतका श्रेस्तेदार केदारप्रसाद गौतमले बताए ।

तर, कारागारले आर्थिक अभावमा सुधारगृह पठाउन नसकिएको जनाएको छ । कारागारका सूचना अधिकारी धनीराम सिंहले भने-'अदालतले दिएको आदेश कार्यान्वयन गर्न बजेट छैन । कारागारमा वयस्कसँग राख्नु रहर होइन । बाध्यता हो ।'

अधिवक्ता बलराम भट्टराईले बालबिज्याईँमा परेकालाई धरौटी र थुनामा समेत राख्न नपाइने भएपनि वयस्कसँगै कारागारमा राखिएकाले कानुनको उल्लङ्घन भएको बताए ।

नेपाल बार एकाई जिल्ला सचिवसमेत रहेका भट्टराईले कानुनको व्याख्या र अदालतको आदेश कार्यान्वयन गर्न यो वा त्यो बहाना हुन नसक्ने बताए ।

पीडित बालिकाको स्वास्थ्य परीक्षण जिल्ला अस्पतालमा असार २ गते गरिएको थियो ।

देवराज गुरुङ