समाचारहरू

बालअधिकारका लागि नागरिक समाजको सञ्जाल (बालअधिकार मञ्च) कास्कीले बालबालिकाहरूको अधिकार दुरूपयोग नगर्न अपील गरेको छ ।

मञ्चले पुस १९ गते विज्ञप्ति जारी गरी पुुस १७ गते पोखरा अन्तर्राष्ट्रिय विमानस्थलको उद्घाटन समारोहमा अतिथि स्वागतका लागि पञ्चकन्याको रूपमा स–साना बालिकाहरू प्रयोग गरिएकोप्रति गम्भीर ध्यानाकर्षण भएको जनाएको छ ।

राज्यले बालबालिकाहरूको अधिकार संविधानमा नै सुनिश्चित गरेपनि यस्ता घटनाले कार्यान्वयन पक्ष अझैपनि संवेदनशिल हुन नसकेको मञ्चले जनाएको छ ।

महानगरपालिकाले पुस १७ गते शैक्षिक संस्था तथा वडा कार्यालयहरूमा अप्रत्यासित सार्वजनिक बिदा दिँदा बालबालिका शिक्षाको अधिकारबाट वञ्चित हुनुका साथै सेवाग्राहीहरू सरकारी सेवा प्राप्त गर्नबाट वञ्चित हुनु परेको मञ्चको ठहर छ ।

बालबालिकाहरूको हित र संवेदनशिलतालाई पहिलो प्राथमिकतामा राखेर यस किसिमका अभ्यासलाई प्रश्रय नदिन पनि मञ्चले सरकारी, गैरसरकारी र नीजि क्षेत्रसँग आग्रह गरेको छ ।

नारायण क्षेत्री