समाचारहरू

कक्षा १० मा अध्ययनरत मल्हनियाँ गाविस-४ की १५ वर्षीया सन्तोषीकुमारी दासको विवाह सोही गाविसका बालबालिकाहरूले माघ २५ गते रोकेका छन् ।

बालिकाको असहमतिमा उनको परिवारले भारत मधुबनीको लौकही प्रि्राहीका २५ वर्षीय युवासँग फागुन ११ गतेका लागि माघ २० गते विवाहको टुङ्गो लगाएका थिए ।

विश्वास बाल क्लब मल्हनियाका पदाधिकारीहरूले क्लबकी कोषाध्यक्षसमेत रहेकी बालिकाको परिवारबाट जबरजस्ती विवाह गर्न लागेको थाहा पाएपछि माघ २१ गते उनको घरमा पुगेर उमेर नपुगी गर्न लागिएको विवाह रोक्न आग्रह गरेका थिए ।

बालबालिकाको आग्रहमा विवाह नरोकिए पछि बाल क्लबका प्रदिपकुमार मण्डल, पञ्कजकुमार दास र भन्नुकुमार मण्डलले प्रहरीको महिला तथा बालबालिका सेवा केन्द्रमा माघ २३ गते यसबारे जानकारी दिएका थिए ।

बालिकाका आमा मीनादेवी र हजुरबुवा झडीलाल दासलाई राखेर प्रहरीले दबाब दिएर सम्झाई बुझाई गरेपछि विवाह रोकिएको सेवा केन्द्रका इन्चार्ज सई मिनकुमार क्षेत्रीले बताए । सई क्षेत्रीका अनुसार बालिकाले आफूले कम्तीमा उच्च मावि उतीर्ण नगरेसम्म विवाह नगर्ने अडान लिएपछि बालिकाका परिवारले विवाह स्थगित गरेका हुन् । २० वर्ष भन्दा कम उमेरमा विवाह गर्न नपाइने कानुनी प्रावधान छ ।

मनोहरकुमार पोखरेल