बालपोषण भत्ताका लागि इन्सेक प्रतिनिधिद्वारा पहल

  ०७८ असोज २६ गते

बारागढी गाँउपालिकाको कार्यालयले गत आर्थिक वर्षको असारमा वितरण गर्नुपर्ने पाँच वर्ष उमेर पूरा नभएका बालबालिकालाई उपलब्ध गराउनु पर्ने बालपोषण भत्ता वितरण नगरेको गुनासो गर्दै अपाङ्गता भएका बालबालिका र बालिबालिकाका अभिभावकहरूले इन्सेक बारा जिल्ला प्रतिनिधिसँग बालपोषण भत्ताका लागि पहल गर्न अनुरोध गरेपछि प्रतिनिधिले उपलब्धताका लागि पहल गर्नु भएको छ ।

गत आर्थिक वर्षको तेस्रो चौमासिक र चालु आर्थिक वर्षको पहिलो त्रैमासिक वितरण गर्नुपर्ने रकम नपाएको भन्दै असोज २४ गते इन्सेक बारा प्रतिनिधि भोलानाथ पौडेललाई पहल गरिदिन बारागढी गाँउपालिका–६ सानो हेगौलियाका अभिभावकहरूले निवेदन दिएका हुन् ।

बालिबालिकाका अभिभावकले अनुरोध गरेपछि इन्सेक प्रतिनिधि भोलानाथ पौडेलले बारागढी गाँउपालिका–६ का वडाध्यक्ष निरजकुमार साह, पञ्जिकरण शाखा प्रमुख सरोजकुमार साह, प्रमुख प्रशासकीय अधिकृत अमोद चौधरीसँग छलफल गरी निकास निकाल्न आग्रह गर्नुभएको छ ।

सो छफलको क्रममा वडाध्यक्ष साहले बालबालिकाको रकम गाउँपालिकाको कार्यालयले उनीहरुको बैङ्क खातामा पठाउने भएकाले वडा कार्यालयले गाउँपालिकाको कार्यालयलाई छिटो निकासा दिन आग्रह गरिरहेको बताउनुभयो ।

उहाँले सामाजिक सुरक्षा भत्ताका विषयमा इन्सेकले भदौ ३ गते समाचार प्रकाशन गरेपछि सबै नागरिकले भत्ता पाएकासमेत बताउनुभयो ।

०७७ चैतदेखि २०७८ असारसम्मको र त्यसयता असोजसम्मको गरी सात महिनाको रकम कात्तिक महिनाको १० गते वितरण गर्ने तयारीमा रहेको पञ्जिकरण शाखाका सरोजकुमार साहले बताउनुभयो ।

उहाँले गत आर्थिक वर्षमा चौमासिक वितरण हुने गरेको बताउनुभयो । उहाँले चालु आर्थिक वर्षमा प्रत्येक तीन महिनामा वितरण गर्नुपर्ने व्यवस्था रहेपनि भदौमा वितरण गर्न नसकेकाले ढिलै भएपनि कात्तिकमा वितरण हुने बताउनु भयो ।

उहाँले पाँच वर्ष मुनिका २ हजार बालबालिकालाई वितरण गर्नु पर्ने भएकाले नविकरण गर्ने र बैङ्क खाता खोल्नेलगायतका कार्यले गर्दा समस्या भएको बताउनुभयो ।

ज्येष्ठ नागरिक, दलित ज्येष्ठ नागरिक, एकल महिला, विधुवा महिला, पूर्ण अशक्त अपाङ्गता भएका व्याक्तिलगायत लक्षित वर्गलाई सामाजिक सुरक्षा भत्ता वितरण गरेको र बाल पोषण भत्ता मात्र वितरण गर्न बाँकी रहेकाले दशैँको विदापछि वितरण गर्ने बारागढी गाउँपालिकाका प्रमुख प्रशासकीय अधिकृत अमोद चौधरीले बताउनुभयो ।


अनलाइन डेस्क