बालक हत्या घटनाका आरोपितहरू गिरफ्तार

  ०७३ मङ्सिर ३० गते

हरीपुर गाविस-३ का आठ वर्षीय बालक दुर्गानन्द साहको हत्या गरेको आरोपमा हरीपुर गाविस-३ का २७ वर्षीय चुडामणी ठाकुर, हरीपुर गाविस-१ का १९ वर्षीय रामबाबु गुप्ता साह र देउरी गाविस-२ घर भई राजविराज नपा-५ स्थित मनीषा कम्युनिकेशनका सञ्चालक २२ वर्षीय कपिलदेव दासलाई प्रहरीले मङ्सिर ३० गते गिरफ्तार गरेको छ ।

मोबाइल टावर लोकेशनबाट गिरफ्तार गरिएका आरोपितहरूले बताएअनुसार बालकको मुखमा डोरीले बाँधेर हत्या गरेपछि छिमेकी पन्नालाल साहको शौचालयको सेफ्टी टयाङ्कीमा बोराभित्र राखेर फालेको अवस्थामा मङ्सिर ३० गते लाश फेला पारिएको जिल्ला प्रहरी कार्यालयका एसपी देवेश लोहनीले बताए ।

एसपी लोहनीका अनुसार सडेगलेको अवस्थामा निकालिएको शवको फोरेन्सिक शव परीक्षणका लागि विपी कोइराला स्वास्थ्य विज्ञान प्रतिष्ठान धरान पठाइएको छ ।

प्रहरीको अनुसन्धानबाट मङ्सिर ११ गते राति छिमेकी ठाकुरले बालक अपहरण गरी हत्या गरेर अर्का छिमेकी पन्नालाल साहलाई फसाउन उनको शौचालयको सेफ्टी ट्याङ्कीमा फालेको जिल्ला प्रहरी कार्यालयका डिएसपी दानबहादुर कार्कीले बताए ।

अपहरित बालकको हत्या पछि साह परिवार शोकमा डुबेको छ । छिमेकीले नै अपहरणपछि बालकको हत्या गरेको घटनापछि गाउँले त्रसित बनेका छन् ।


मनोहर कुमार पोखरेल