समाचारहरू

ठाडा गाविस-५ का १३ वर्षीय बालक राजन भुसालको हत्या भएको २ वर्षबितिसक्दा पनि घटनाको अनुसन्धान अझै पूरा नभएको प्रहरीले जनाएको छ ।

पीडित बालक ०७१ मङ्सिर ६ गते हराएपछि पीडितका परिवारले मङ्सिर ९ गते इलाका प्रहरी कार्यालयमा उजुरी दिएका थिए । बालकको शव ०७१ मङ्सिर १४ गते सोही गाविसमा रहेको म्यालीखोल्सामा भेटिएको थियो ।

घटनाको अनुसन्धान पूरा नुहँदा दोषी पत्ता लाग्न नसकेको स्थानीय भरत विकले बताए । 'घटनाको दुई वर्षबितिसक्दा पनि प्रहरीले अझै अनुसन्धान भइरहेको छ भनि जवाफ दिन्छ, हामी कहिलेसम्म अनुसन्धानको आशामा बस्ने ?' पीडितका बुवा शिव भुसालले प्रश्न गरे ।

जिल्ला प्रहरी कार्यालयका डिएसपी नवरत्न पौडेलले घटनाको बारेमा अनुसन्धान गरिरहेको र छिट्टै दोषीको पहिचान हुने बताएका छन् ।

नारायण भुसाल