समाचारहरू

ज्याभ्लिङ थ्रो खेलको अभ्यासका क्रममा घाइते भएका फालेलुङ गाउँपालिका–२ का १० वर्षीय अनुस राईको उपचारको क्रममा फागुन १६ गते मृत्यु भएपछि प्रहरीले तीन जनाविरूद्ध उजुरी दर्ता गरेको छ ।

प्रहरीले फालेलुङ गाउँपालिका–२ स्थित सिद्धकाली माध्यमिक विद्यालयका प्रधानाध्यापक फालेलुङ गाउँपालिका–२ का ५६ वर्षीय वीरेन्द्र खत्री, खेल शिक्षक सोही ठाउँका ४३ वर्षीय वसन्त खत्री र १७ वर्षीय बालक सुरज कार्कीविरूद्ध फागुन १६ गते उजुरी दर्ता गरिएको जिल्ला प्रहरी कार्यालयका डिएसपी राकेश थापाले बताउनु भयो ।

बालकको फागुन १६ गते उपचारका क्रममा मृत्यु भएपछि प्रधानाध्यापक, खेल शिक्षक र सुरज कार्कीविरूद्ध पीडित पक्षले सोही दिन इलाका प्रहरी कार्यालय विर्तामोडमा मौखिक उजुरी गरेको जिल्ला प्रहरी कार्यालय पाँचथरका इन्स्पेक्टर डम्वर विश्वकर्माले बताउनु भयो ।

फागुन १५ गते विद्यालय परिसरमा ज्याभ्लिङ थ्रो खेलको अभ्यास गर्ने क्रममा कक्षा १२ मा अध्ययनरत सुरज कार्कीले फ्यालेको ज्याभ्लिङ कञ्चटमा लागि अनुस राई घाइते भएका थिए । उपचारका क्रममा फागुन १६ गते वि एण्ड सी अस्पताल झापामा घाइतेको मृत्यु भएपछि तीन जनालाई सोही दिन गिरफ्तार गरी कारबाही अघि बढाएको डिएसपी थापाले बताउनु भयो ।

फागुन २३ गतेदेखि सुरू हुन लागेको गाउँपालिकास्तरीय राष्ट्रपति रनिङ शिल्ड प्रतियोगिताका लागि अभ्यासका क्रममा चौरमा हिँडीरहेको अवस्थामा छोरालाई ज्याभ्लिङले लागेको ४२ वर्षीय बाबु आइन्द्र राईले बताउनु भयो ।

शवको पोष्टमार्टम फागुन १६ गते मेची अस्पतालमा गरिएको छ । सोही दिन पीडित परिवारले शव बुझी फागुन १७ गते फालेलुङ गाउँपालिका–२ कटुसेमा सद्गत गरेको छ ।

बालकको मृत्यु भएपछि फागुन १६ गतेदेखि विद्यालय बन्द छ ।

सहमान विश्वकर्मा