समाचारहरू

इनरूवा नगरपालिका-९ बवियाका १४ वर्षीय बालक सागर यादवलाई कुटपिट गरेको आरोपमा पीडित पक्षले दुई जनाविरूद्ध प्रहरीमा उजुरी दिएको छ ।

१४ वर्षीय बालकलाई ०८१ भदौ १० गते कुटपिट गरेको आरोपमा पीडित पक्षले इनरूवा नगरपालिका-९ का ५५ वर्षीय देवराम यादव र ३२ वर्षीय रोशकुमार यादवविरूद्ध भदौ ११ गते जिल्ला प्रहरी कार्यालयमा उजुरी दिएको बालकका बाबु ४८ वर्षीय दीपेन्द्र यादवले बताउनु भयो ।

आपसी विवादका क्रममा आरोपितद्वयले छोरालाई निर्घात कुटपिट गरेको पीडितका बाबु दीपेन्द्र यादवले बताउनु भयो ।

कुटपिटबाट शरीरका विभिन्न भागमा चोट लागेका बालकको भदौ १० गतेदेखि जिल्ला अस्पतालमा उपचार भइरहेको छ ।

घटनाका विषयमा अनुसन्धान गरी आरोपितलाई गिरफ्तार गरिने जिल्ला प्रहरी कार्यालयका डिएसपी नवीनकृष्ण भण्डारीले बताउनु भएको छ ।

नेपालको संविधानले धारा ३९ मा बालबालिकाको हकको व्यवस्था गरेको छ ।

सोही धाराको उपधारा ७ मा कुनै पनि बालबालिकालाई घर, विद्यालय वा अन्य जुनसुकै स्थान र अवस्थामा शारिरीक, मानसिक वा अन्य कुनै किसिमको यातना दिन पाइने छैन भनि उल्लेख गरिएको छ ।

जयकृष्ण यादव