बालकलाई घर निर्माणको काममा लगाएका आरोपित विद्यालय सञ्चालिका विरुद्ध उजुरी

  ०८० चैत १६ गते

सखुवा प्रसौनी गाउँपालिका–५ महुवन का ७ वर्षीय बालकलाई घर निर्माणको काममा लगाएको आरोपमा सोही वडा स्थित श्री राम जानकी इङ्गलिश बोर्डिङ्ग स्कुलकी सञ्चालिका ३२ वर्षीया भागवन्ती कलवार विरुद्ध पीडित पक्षले ०८० चैत १५ गते इलाका प्रहरी कार्यालयमा उजरी दिनु भयो ।

श्री राम जानकी इङ्गलिश बोर्डिङ्ग स्कुलमा कक्षा एलकेजीमा अध्ययनरत आफ्नो छोरालाई चैत ११ गते विद्यालय पढ्न गएको समयमा विद्यालय सञ्चालिकाले घर निर्माणको कार्यमा लगाउँदा लडेर गम्भीर घाइते भएको पीडितका बुबा चन्दन साह गोढको आरोप रहेको छ ।

घाइते बालकको बाराको परवानीपुर गाउँपालिका स्थित एलएस न्यूरो एण्ड जेनरल होस्पिटलमा उपचार भइरहेको उहाँले बताउनु भयो । गम्भीर घाइते भएका पीडितको टाउकोमा २८ ओटा टाँका लागेको पीडित पक्षले बताउनु भयो ।

तर, आरोपित भागवन्ती कलवारले आफूले कुनै पनि बालबालिकालाई भवन निर्माणको काममा नलगाएको बताउनु भयो । भवन निर्माण भइरहेको ठाउँमा होली मनाउन तयारी गरिरहेका ठूला/ठूला विद्यार्थीहरूसँगै गएका पीडित बालक लडेर घाइते भएको उहाँले बताउनु भयो । साथै घाइते भएको दिनदेखि नै आफूले बालकको उपचार समेत गराउँदै आएको उहाँले बताउनु भयो ।

घटना बारे अनुसन्धान भइरहेको इलाका प्रहरी कार्यालय पोखरियाका इन्सपेक्टर मोहन बिक्रम केसीले बताउनु भयो ।


शम्भुकुमार सुमन