समाचारहरू

भोक्राहा नरसिंह गाउँपालिकामा बाढी प्रभावित र प्रहरीबिच भएको झडपमा एक जना प्रहरीसहित तीन जना घाइते भएका छन् ।

बाढी प्रभावितहरूले भोक्राहा नरसिंह गाउँपालिका कार्यालय असोज २१ गते घेराऊ गरी राहत माग गर्दै तोडफोड गरेपछि प्रहरी र बाढी प्रभावितबिच झडप भएको हो । झडपमा सशस्त्र प्रहरीका इन्स्पेक्टर जय चौधरी, एक जना वरिष्ठ हवल्दार घाइते हुनु भएको छ ।

झडपमा बाढी प्रभावित तथा आन्दोलनकारी भोक्राहा नरसिंह गाउँपालिका-५ की मालोदेवी मण्डल र तजमुल हुसेन घाइते भएका छन् । घाइते हुनुभएका सशस्त्र प्रहरी इन्स्पेक्टर जय चौधरीको गाला र घाँटीमा चोट लागेको छ । वरिष्ठ हवल्दारको गोडामा चोट लागेको छ । मालोदेवी मण्डलको टाउकामा चोट र तजमुल हुसेनको गोडामा सामान्य चोट लागेको छ । झडपमा घाइते भएका सबैको न्यूरो अस्पताल भोक्राहा उपचार गरिएको जिल्ला प्रहरी कार्यालयले जनाएको छ ।

भोक्राहा नरसिंह गाउँपालिकाका अध्यक्ष अजमल अख्तर आजादले बाढी प्रभावित भन्दा राजनीतिक प्रतिशोधका कारण प्रदर्शन गराइएको र गाउँपालिका कार्यालयमा नियोजित रूपमा तोडफोड गरिएको आरोप लगाउनु भयो । आजादले घटनापछि असोज २१ ग्ते पत्रकार सम्मेलन गरी बाढी प्रभावितहरूलाई प्रयोग गरेर र केही राजनीतिक प्रतिशोधका कारण गाउँपालिका कार्यालयमा तोडफोड गराइएको गाउँपालिकाका अध्यक्ष अजमल अख्तर आजादले बताउनु भयो ।

तोडफोडबाट गेटमा रहेको गाउँपालिकाको बोर्ड, सुरक्षा गार्ड बस्ने कोठाको झ्याल, गाउँपालिका अध्यक्षको कार्यकक्षको झ्याल, सभाहल र प्रशासन कक्षको झ्याल, प्रमुख प्रशासकीय अधिकृत कक्षको झ्यालसहित १० ओटा झ्यालमा क्षति पुगेको छ । तोडफोडबाट ३ लाख रुपियाँ बराबरको क्षति भएको गाउँपालिकाले जनाएको छ ।

जयकृष्ण यादव