समाचारहरू

गत असारमा बाढी पहिरोका कारण धान, गहुँ मकैमा क्षति भएपछि पीडित भएका १७ गाविसका किसानहरूले हालसम्म राज्यबाट राहत रकम पाएका छैनन् ।

बाढी पहिरोका कारण खरकडा, दत्तु, शङ्करपुर, मालिकार्जुन, भगवती, ग्वानी, लाली, डाँडाकोट, उकु, हुनैनाथ, सर्मौली, गोकुलेश्वर, देथला, रिठाचौपाता, शिखर र बोहरीगाउँमा धान गहुँ मकैमा क्षति पुगेको कृषि विकास कार्यालयले जनाएको छ ।

रिठाचौपाताका पीडित किसान कमलसिंह बोहराका अनुसार बाढी गएको एक वर्षपुग्नै लाग्दासमेत किसानहरूले अहिलेसम्म राहत पाउन सकेका छैनन् । 'क्षतिपूर्ति दिने भनेर जिल्ला कृषि विकास कार्यालयमा विवरण पेश गर्‍यौँ तर सुनुवाइ भएन ।'-उनले भने ।

बाढीका कारण मात्र जिल्लामा १ सय १७ दशमलव ५ हेक्टर जमीनमा लगाएको बाली क्षति भएको थियो । बाढीपहिरोका कारण ८ सय ७७ घरधुरी प्रभावित भएका थिए । जसले गर्दा १७ 'गाविस'का किसानहरूको ९८ लाख ४२ हजार ५ सय रुपियाँको क्षति पुगेको कृषि विकास कार्यालयले जनाएको छ ।

किसानहरूलाई क्षतिपूर्ति दिलाउन मन्त्रालय विभागमा क्षतिको विवरण पठाइए पनि क्षतिपूर्ति दिने भनेर हालसम्म कुनै बजेट विनियोजन नभएको वरिष्ठ कृषि विकास अधिकृत सूर्यप्रसाद बरालले बताए । 'क्षतिपूर्ति दिने प्रावधान भएपनि अहिलेसम्म बजेट भने आएको छैन ।'-उनले भने ।

मार्कामा परेका किसानहरूलाई थोरै भएपनि क्षतिपूर्ति दिनुपर्छ भनेर पटकपटक पहल गरेपनि सुनुवाइ नहुँदा किसानहरूले समस्या झेल्नु परेको बराल बताउँछन् ।

नरेन्द्रसिंह कार्की