समाचारहरू

मिक्लाजुङ गाउँपालिका–५ कुरूम्बामा बिरामीको उपचारका लागि जाने क्रममा दुई जना स्वास्थ्यकर्मी कात्तिक २ गते बाढी पहिरोमा परी बेपत्ता भएको साता बितेपनि उनीहरूको अवस्था सार्वजनिक हुन नसकेको पीडित परिवारले जनाएको छ ।

इलाम जिल्लाको माङसेबुङ गाँउपालिका–२ का ४३ वर्षीय सुमन राई र इलाम नगरपालिका–२ का ४७ वर्षीय ठाकुरप्रसाद याक्खा बिरामीको उपचारका लागि मिक्लाजुङ गाउँपालिका–५ कुरूम्बा जाने क्रममा बाढी पहिरोमा परी बेपत्ता भएको मिक्लाजुङ गाउँपालिकाका अध्यक्ष अमरराज माखिमले इन्सेक प्रतिनिधिसँगको फोन सम्पर्कमा बताउनु भयो ।

इलामको माङसेबुङ गाउँपालिका–२ बाँझो स्वास्थ्य चौकीमा कार्यरत सिनियर अहेब(वरिष्ठ स्वास्थ्य सहायक) ४३ वर्षीय सुमन राई र सोही कार्यालयमा जनस्वास्थ्य निरीक्षक पदमा कार्यरत ४७ वर्षीय ठाकुरप्रसाद याक्खा कात्तिक २ गतेदेखि बेपत्ता भएको गाउँपालिका अध्यक्ष माखिमले बताउनु भयो ।

उपचारका लागि जाने क्रममा पति बेपत्ता भएपनि कात्तिक १० गतेसम्म उहाँको अवस्था पत्ता लाग्न नसकेको ठाकुरप्रसादकी पत्नी चित्रमाया साम्बाहाम्फेले बताउनु भयो ।

पतिले दुई ओटा मोबाइलमा चार ओटा सीमकार्ड प्रयोग गरेको भएपनि कात्तिक २ गतेदेखि बेपत्ता भएपछि टेलिफोन सम्पर्क हुन नसकेको र खोजीका लागि जिल्ला प्रहरी कार्यालय पाँचथरमा कात्तिक ४ गते निवेदन दिएको सुमन राईकी पत्नी रमा लिम्बूले बताउनु भयो ।

प्रहरी चौकी रवि पाँचथरका इञ्चार्ज कुशल अधिकारीको नेतृत्वमा नेपाल प्रहरी, सशस्त्र प्रहरीका साथै धरानबाट तालिम प्राप्त कुकुर ल्याएर सम्भावित क्षेत्रमा खोजी जारी राखिएको भएपनि हालसम्म बेपत्ता भएकाहरूको अवस्था पत्ता लाग्न नसकेको जिल्ला प्रहरी कार्यालयका इन्स्पेक्टर डम्वर विश्वकर्माले इन्सेक प्रतिनिधिसँगको फोन सम्पर्कमा बताउनु भएको छ ।

मानव अधिकार रक्षकसम्बन्धी घोषणापत्र सन् १९९८ ले स्वास्थ्यकर्मीलाई मानव अधिकार रक्षकको रूपमा परिभाषित गरेको छ ।

सहमान बिश्वकर्मा