समाचारहरू

सर्केगाड गाउँपालिका–१, जैरस्थित तारा आधारभूत विद्यालयमा बाढी पहिरोका कारण विद्यालय बन्द हुँदा विद्यार्थीहरूको पठनपाठनमा समस्या भएको छ । नियमित परेको वर्षासँगै बढखोलामा आएको बाढी पहिरोका कारण खोला तर्न नसक्दा विद्यार्थीहरूको पठनपाठनमा समस्या भएको जैरका स्थानीय डिलबहादुर कार्कीले बताउनु भयो ।

गाउँबाट करिब तीन किलाेमिटर टाढा रहेको उक्त विद्यालय बिच भागमा पर्ने बढखोलामा पहिरो आएका कारण खोलामा लगाइएको काठेपुल बगाएपछि विद्यार्थीहरूलाई विद्यालयसम्म पुग्नलाई समस्या भएको कार्कीको भनाइ छ ।

अविरल वर्षाका कारण माथिबाट पहिरो आउने भएका कारण जोखिम मोलेर विद्यालय पठाउन नसक्ने अभिभावकहरूले बताएका छन् । खोलामा आएको बाढी पहिरोका कारण लामो समयदेखि विद्यालय नै बन्द रहेको प्रधानाध्यापक कर्मसिंह बुमीले जानकारी दिनुभयो ।

१ सय १५ जनाभन्दा बढी विद्यार्थीको सङ्ख्या रहेको विद्यालयमा हाल कक्षा ५ सम्म पठनपाठन हुने गरेको प्रधानाध्यापक बुमीको भनाइ छ । यो समय जिल्लामा नियमित रूपमा परेको वर्षाले विद्यालयमा हिँडेका विद्यार्थीहरूलाई बाटोमा निकै समस्या हुने गरेको विद्यालय व्यवस्थापन समितिका अध्यक्ष लालबहादुर बुढाले जानकारी दिनुभयो । उहाँले साउन १८ गते मात्रै विद्यालयमा पढ्नका लागि हिँड्नुभएकी कक्षा ३ छात्रा सानु बुढालाई माथिबाट आएको ढुङ्गा लाग्दा जिल्ला बाहिर सुर्खेतमा उपचार गर्नु परेको बताउनु भयो ।

अविरल वर्षाका कारण विभिन्न ठाउँमा क्षति भएको छ । केही दिन अघिदेखि राति वर्षा हुने र दिनमा घाम लाग्ने गरेको भए पनि निरन्तर वर्षा हुँदा क्षति भएको हो । अविरल वर्षाकै कारण अदानचुली गाउँपालिका–२ का मोहन महताराको घर भत्किएको छ । रातभर परेको पानीका कारण घर पछाडि पट्टीको पुरै पर्खाल भत्किएको छ । निरन्तर वर्षा भइरहँदा घरको पर्खालमा पानी छिरेर पर्खाल भत्किएको घरमुली महताराले जानकारी दिनुभयो ।

नन्द सिंह