समाचारहरू

पैयुँ गाउँपालिका–५ मा रहेको बानीडाँडा प्राथमिक विद्यालयमा साउन २४ गते राति आएको वर्षातका कारण बाढी पसेर क्षति पुर्‍याएको छ । विद्यालय नजिकको टिउरीखोलाको लेदो पसेर विद्यालयमा क्षति पुर्‍याएको हो । बाढीले विद्यालयका कोठाहरू गेग्रानले भरिएका छन् । विद्यालयको भौतिक संरचनामा क्षति भएको छ ।

बाढीले क्षति पुर्‍याएका कारण विद्यालय स्थानान्तरण गर्नुपर्ने अवस्था आएको पैयुँ गाउँपालिका–५ का वडा अध्यक्ष नारायण भुर्तेलले बताउनु भयो । अहिले विद्यालयमा बाढीले क्षति पुर्‍याएपछि छिमेकमा रहेका खाली घरमा राखेर बालबालिकालाई पठनपाठन गर्नु परेको वडा अध्यक्ष भुर्तेलले बताउनु भयो ।

खोला नियन्त्रणका लागि तत्काल पुर्वाधार निर्माण नगरे विद्यालय नै स्थानान्तरण गर्नुपर्ने अवस्था आएको उहाँको भनाइ छ । तत्कालका लागि विद्यालय सञ्चालनमा ल्याउन स्थानीय तह मार्फत पहल भइरहेको र गण्डकी प्रदेश सरकार सामाजिक विकास मन्त्रालयमा समेत मर्मतका लागि प्रस्ताव गरिएको गाउँपालिका अध्यक्ष तोरण मल्ल ठकुरीले जानकारी दिनुभयो ।

विद्यालयमा बाल कक्षादेखि कक्षा ५ सम्म ३९ जना विद्यार्थी अध्ययनरत छन् । अहिले व्यवस्थापन गरेर पठनपाठन गर्न समस्या भएको अध्यक्ष भुर्तेलले बताउनु भयो ।

सन्तोष थापा