समाचारहरू

साता अघि आएको भारी वर्षा र बाढीले कच्ची घरमा पानी, बालुवा, पाँगो पसेसँगै घरको बार भत्किनु र झरीका कारण छाना चुहिएकाले यहाँका सुत्केरीहरूलाई समस्या भएको छ ।

पसाहा खोलामा आएको बाढीले कलैया उपमहानगरपालिका-१४ को भौरा र बघवन टोलको ६ जना भन्दा बढी एक महिनाभित्रका सुत्केरी ओसिलो र हावा लाग्ने घरमा बस्न बाध्य भएकाले सुत्केरीको हातगोडा, जीउ, अनुहार, सुनिएको तथा पहेँलो भएको छ ।

शिशुलाई न्यानो कपडाको अभाव छ । झुल नभएर लामखुट्टेको टोक्ने गरेको पीडित महिलाहरूको गुनासो छ । महिला तथा बालबालिका कार्यालयकी प्रमुख अञ्जु ढुङ्गानाले बाढी र वर्षा थामिएको साता बितिसक्दा जिल्लाका सयौँ सुत्केरी यस्तै खालको समस्याबाट पीडित भएको बताइन् । सुत्केरी र पोषण क्षेत्रमा काम गर्ने निकायसँग सुत्केरीलाई चाहिने राहत दिन सामग्री छैन ।

तीन महिना भित्रका झण्डै ५ सय सुत्केरी रोगको जोखिममा रहेको उनले बताइन् । राहत सामग्रीको लागि युनिसेफलाई पत्राचार गरिएको उनले जानकारी दिइन् । 'उनीहरूलाई चाहिने राहत सामग्री नभएर अवस्था नाजुक छ ।'-उनले भनिन्-'सुत्केरीहरू सुख्खा चिउरा, भात, बिस्कुट, चाउचाउ खाएर भुइँमा बसेका छन् ।'

लक्ष्मी सोनार