समाचारहरू

बाढी प्रभावित डुडुवा गाउँपालिकास्थित श्री नेपाल राष्ट्रिय प्रावि सन्तलिया, जनता आधारभूत विद्यालय पिप्रहवा, नेरा प्रावि चौफेरीका बालबालिकाहरूको पाठ्यपुस्तक बाढीले बगाउँदा उक्त विद्यालयमा अध्ययनरत बालबालिकाको पठनपाठन प्रभावित भएको छ ।

साउन २७ र २८ गते आएको बाढीले बगाएका पुस्तक भदौ १२ गतेसम्म बालबालिकाले कुनै निकायबाट पाउन सकेका छैनन् । बाढी प्रभावित क्षेत्रका केही विद्यालय सञ्चालनमा आए पनि सबै विद्यालय भदौ १२ गतेसम्म सञ्चालन हुन सकेका छैनन । सञ्चालनमा आएका विद्यालयमा पाठ्यपुस्तक नहुँदा विद्यार्थी विद्यालय जान छोडेका छन् ।

डुडवा गाँउपालिकाकास्थित श्री नेरा प्रावि सन्तलिया, जनता आधारभूत विद्यालय पिप्रहवा, नेरा प्रावि चौफेरी भदौ १२ गतेसम्म सञ्चालन हुन सकेका छैनन् । भदौ १२ गतेदेखि विद्यालय सञ्चालन भएको प्रि्रहवामा ६ सय विद्यार्थी रहेको भएपनि कक्षा १ देखि ८ सम्म २९ जना विद्यार्थी मात्र विद्यालय आएका छन् ।

उक्त विद्यालयका प्रधानाध्यापक सावितराम बर्माले सबै विद्यार्थीको पाठ्यपुस्तक बाढीले बगाएको र केही काम नलाग्ने गरी भिजेको बताए । यस विषयमा जिल्ला शिक्षा कार्यालयमा जानकारी गराएपनि हालसम्म पाठ्यपुस्तक उपलब्ध नभएको प्रधानाध्यापक बर्माले गुनासो गरे ।

जिल्ला शिक्षा कार्यालयका अनुसार जिल्लामा करिब ६ हजार विद्यार्थीको पाठ्यपुस्तक नष्ट भएको छ । जिल्ला शिक्षा अधिकारी भीमबहादुर साउदले पाठ्यपुस्तक खरिदका लागि २७ लाख रुपियाँ माग गरिएको बताउँदै छिट्टै नै पुस्तक उपलब्ध गराइने आश्वासन दिए ।

विनोद पाण्डे