समाचारहरू

खार्पूनाथ गाउँपालिका-३ स्थित कारङ्गा खोलाको काठेपुल बाढीले बगाउँदा हुम्ला मावि रायामा पठनपाठन गर्ने कारङ्गा गाउँका २० जनाभन्दा बढी बालबालिका १८ दिनदेखि विद्यालय जानबाट वञ्चित भएका छन् ।

कारङ्गा खोलामा रहेको काठेपुल जेठ २५ गते परेको अविरल वर्षाले बगाएपछि उक्त विद्यालयमा अध्यनरत बालबालिकालाई आवतजावतका लागि समस्या भएको स्थानीयवासी रती सुनारले गुनासो गरे ।

आवातजावतको एक मात्र काठेपुल बगाउँदा कारङ्गा गाउँका २० जना बालबालिका पठनपाठनबाट वञ्चित भएको स्थानीयबासी सुनारले जानकारी गराए ।

यहाँका बालबालिका बर्षौँदेखि उक्त काठेपुलबाट आवतजावत गर्ने गरेका भए पनि बाढीले पुल बगाउँदा आफ्ना बालबालिकाको पढाई प्रभावित भएको स्थानीयबासी तारा शाहीले बताइन् । हुम्ला मावि रायामा जान करिव चार घण्टाको उकालो पार गर्नु पर्ने भएकाले आफूलाई समस्या भएको कक्षा आठमा अध्यनरत पविता शाहीले गुनासो गरिन् ।

आजभोली सो विद्यालयमा दश पूर्णाङ्कको त्रराई मासिक परीक्षा सञ्चालन भएको छ, हाम्रो नम्वर पनि छुट्यो अब के गर्ने सात कक्षामा अध्यनरत भाईवला सिंहले बताइन् ।

नन्द सिंह