समाचारहरू

सिदिङ्मा गाउँपालिका–६ मेहेलेसहितका बाढीपहिरो प्रभावित २९ घर परिवारलाई जिल्ला विपद् व्यवस्थापन समिति र स्थानीय तहले राहत प्रदान गरेका छन् ।

बाढी पहिरो प्रभावितहरूलाई विपद् व्यवस्थापन समिति र स्थानीय सरकारले समन्वय गरी ४ लाख ३५ हजार रुपियाँ राहत प्रदान गरेको जिल्ला व्यवस्थापन समिति अध्यक्ष तथा प्रमुख जिल्ला अधिकारी गोमादेवी चेम्जोङले बताउनु भयो ।

जिल्ला विपद् व्यवस्थापन समितिले जनही १५ हजारका दरले नगद राहत प्रदान गरेको प्रमुख जिल्ला अधिकारी चेम्जोङ्गले बताउनु भयो ।

नेपाल रेडक्रस सोसाइटी ताप्लेजुङ, शाखाले मेहेलेका ८१ घर परिवारलाई दैनिक उपभोग्य सामाग्री ०८० असार १४ गते वितरण गरेको छ । रेडक्रस सभापति इन्द्रबहादुर गुरुङले बाढीपहिरो प्रभावितलाई दैनिक उपभोग्य सामग्री विवरण गरेको बताउनु भयो ।

जिल्ला विपद् व्यवस्थापन समितिले सिदिङ्वा गाउँपालिका–६ मेहले, वडा–७ सुरुमखिम र वडा–३ आङ्खोप सबैभन्दा बढी पहिरो प्रभावित क्षेत्र भएको जनाएको छ । असार ११ गते प्रशासनले उक्त क्षेत्रका पहिरो पीडित ६३ घर परिवालाई एक-एक थान पाल र ब्लाङ्केट, ६ घर परिवारलाई चार थान चाइनिज फेमेली टेण्ट र दुई-दुई थान कम्बल वितरण गरेको प्रमुख जिल्ला अधिकारी गोमादेवी चेम्जोङले बताउनु भयो ।

पहिरोको जोखिममा परेको मैवाखोला गाउँपालिकाका ६१ घर परिवारलाई पनि प्रतिपरिवार २५ केजी चामललगायतका सामग्री वितरण गरिएको छ ।

सिदिङ्मा गाउँपालिकाको पहिरोग्रस्त क्षेत्रको स्थलगत अनुगमनपछि विपद् व्यवस्थापन समिति अध्क्ष चेम्जोङले पहिरो प्रभावितहरूलाई थप राहतको आवश्यकता भएकाले सोही अनुसार योजना बनाउने बताउनु भयो ।

जिल्लामा बाढीपहिरोको जोखिममा परी दुई जना महिला र एक जना पुरूष गरी तीन जनाको मृत्यु भएको छ । दुई जना महिला र एक जना पुरूष  असार १८ गतेसम्म वेपत्ता छन् । १ सय ११ ओटा घर उच्च जोखिम तथा १ सय २५ ओटा घर जोखिममा परेको प्रशासनले जनाएको छ ।

देवराज गुरुङ