समाचारहरू

बाढीपहिरोका कारण भत्किएका जयपृथ्वी नगरपालिका–१ कैलाशस्थित बेताल अधारभूत प्राथमिक विद्यालय र खप्तडछान्ना गाउँपालिकामा–१ खाती गाउँमा रहेको जगदम्बा निमावि पुनर्निर्माण हुन नसक्दा विद्यार्थीहरुको पठनपाठनमा समस्या उत्पन्न भएको छ ।

गत असोज ३१ गतेदेखि कात्तिक ३ गतेसम्म परेको अविरल वर्षाका कारण आएको बाढीपहिरोले बेताल आधारभूत प्राथमिक विद्यालयको एक तलाको  दुई कोठे भवन र दुई तलाको तीन कोठे भवन पुरै भासिएपछि पठनपाठनमा समस्या भएको हो ।

२०५४ सालमा स्थापना भएको बेताल आधारभूत विद्यालयमा हाल १ सय ७४ जना विद्यार्थीहरु अध्ययनरत रहेका छन् ।

विद्यालय भित्र पठनपाठन गर्ने अवस्था नभएपछि विद्यालय नजिकै रहेका खेतहरुमा राखेर पढाउने गरेको विद्यालयका प्रधानाध्यापक पुष्पराज जोशीले बताउनु भयो ।

उहाँले भन्नु भयो– ‘विद्यालय बन्द गरौँ भने के गर्ने ? बैकल्पिक पढाई गर्नु पर्ला भनेर नेपाल रेडक्रस सोसाइटीसँग पाल माग्न जाँदा विद्यालयमा पाल दिने व्यवस्था नभएको भन्दै रित्तै हात फर्किए । पहिरोका कारण खानेपानीका धाराहरु र शौचालय समेत पुरिएपछि विद्यार्थीहरुलाई खानेपानी र शौचालयको समेत अभाव छ ।’

खप्तडछान्ना गाउँपालिकामा–१ खाती गाउँमा रहेको जगदम्बा निमाविको आठ कोठे पक्की भवन जडारी गाडमा आएको बाढीले बगाएपछि विद्यार्थीहरुलाई खुला आकाशमा राखेर पठनपाठन गराउँदै आएको विद्यालयका प्रधानाध्यापक लालबहादुर खत्रीले गुनासो गर्नु भयो ।

उहाँले भन्नु भयो– ‘विद्यालय भवन निर्माणका लागि विभिन्न निकायमा अनुरोध गरिएको छ । तर, सुनवाइ हुन सकेको छैन् । विद्यालयमा १ सय ६० जना विद्यार्थी अध्ययनरत छन् । घाम लागेको दिन विद्यार्थीहाई खुला आकाश मुनी राखेर पढाउने गरिएको छ । पानी परेको र चिसो भएका दिन पठनपाठन पूर्ण अवरुद्ध हुने गरेको छ ।’

जयपृथ्वी नगरपालिका–१ का वडाध्यक्ष तथा बेताल आधारभूत प्राथमिक विद्यालय व्यवस्थापन समितिका अध्यक्ष गगनबहादुर सिंहले वडा कार्यालयसँग  पनि यो वर्ष विद्यालय भवन निर्माणका लागि बजेट नभएकोले समस्या उत्पन्न भएको बताउनु भयो ।

विद्यालय पुनर्निर्माण गर्न ठुलो बजेटको आवश्यकता रहेको र विद्यालयको जमिन सबै भासिएका कारण विद्यालय नै सराउनु पर्ने भएकाले अभिभावक र जग्गा दातासँग समन्वय भइरहेको समेत वडाध्यक्ष सिंहले बताउनु भयो ।

बाढीपहिरोले जिल्लाका ६५ ओटा विद्यालयमा आंशिक रुपमा क्षेति भएको र दुई ओटा विद्यालयमा पूर्ण रुपमा क्षेति भएकोले पठनपाठनमा समस्या उत्पन्न भएको सामाजिक विकास कार्यालय, बझाङका प्रमुख बिरबहादुर धामीले बताउनु भयो ।

क्षेतिको आकलन गर्दा शैक्षिक क्षेत्रका भौतिक संरचनाहरुमा १० करोड ८१ लाख रुपियाँ बराबरको क्षेति भएको विवरण सुदूरपश्चिम प्रदेश सरकारलगायत सरोकारवाला निकायममा पठाइसकिएको धामीले बताउनु भयो ।

सम्बन्धीत निकायहरुबाट विद्यालय मर्मत तथा पुनर्निर्माणका लागि विषेश बजेटको व्यवस्था नभएसम्म तत्तकाल समस्या समाधान गर्न नसकिने भएकोले बैकल्पिक विधि तथा व्यवस्था गरेर विद्यालयको पठनपाठन सुचारु गरिने समेत धामीको भनाई छ ।

सत्यराज सिंह