समाचारहरू

अविरल वर्षाका कारण सहिदनगर नगरपालिका-४ महुलिया टोलका ५२ घर डुबानमा परेका छन् भने जनजीवन प्रभावित भएको छ ।

०८१ साउन ४ गते राति परेको पानीको उचित निकास नहुँदा घरहरू डुबानमा परेका छन् । पानी निकास हुने ठाउँमा पक्की बाटो बनाएपछि घरभित्र पानी पसेको ४० वर्षीय रामदेव यादवले बताउनु भयो । “बाढीका कारण स्थानीयले प्राथमिक उपचार समेत पाएका छैनन्”–उहाँले बताउनु भयो ।

स्थानीयवासी राम उद्गार यादवले डुबानका कारण खान बस्नुको साथै बालबालिकाहरूलाई विद्यालय आउ जाउ गर्न समेत समस्या भएको बताउनु भयो । साउन २५ गते एक पाँच वर्षीय बालक पानीमा डुबिरहेको अवस्थामा स्थानीयहरूले बचाएको उहाँले बताउनु भयो । समस्या बारे स्थानीय सरकारलाई पटकपटक जानकारी गराएपनि अहिलेसम्म कुनै व्यवस्था नगरेको स्थानीयहरूले गुनासो गर्नु भयो ।

घरहरूभित्र वर्षाको पानी पसेर खाद्य वस्तुहरू पूर्ण रुपमा नष्ट हुनुका साथै विषालु सर्पको त्रास पनि बढ्दै गएको स्थानीय २५ वर्षीया ललिता शाहले बताउनु भयो भने अविरल वर्षाको प्रभावका कारण आफ्नो घर छाडी विगत १२ दिनदेखि आफन्तको घरमा बस्दै आएको ३४ वर्षीया शिला महाराले दुःखेसो सुनाउनु भयो ।

इन्सेक धनुषा जिल्ला प्रतिनिधि सन्तोषकुमार यादवले घटनास्थलमा पुगी पीडितहरूको समस्या बुझ्दै वडा अध्यक्ष रामनारायण मुखियासँग पीडितहरूको समस्या समाधानका विषयमा छलफल गर्दा “हामी पानीको निकासका लागि काम गरिरहेका छौं र दुई दिनभित्र यो समस्या समाधान हुने” प्रतिबद्धता जनाएको बताउनु भयो ।

त्यस्तै इलाका प्रहरी कार्यालय यदुकुहाका इन्सपेक्टर राजकिशोर शाहको अनुसार नेपाल प्रहरी टोलीले डुबानमा परेका स्थानीयहरूसँग समन्वय गर्दै आएको बताउनु भयो।

सन्तोषकुमार यादव