बाजुरामा अत्यावश्यक औषधिको अभाव

बाजुरा जिल्लाका सबै स्वास्थ्य संस्थाहरूमा अत्यावश्यक औषधिको अभाव भएको छ । स्थानीय तहहरू मिलानसँगै औषधिको अभाव भएको जिल्ला स्वास्थ्य कार्यालयका जनस्वास्थ्य अधिकृत रमेश कुँवरले जानकारी दिए ।

जिल्ला स्वास्थ्य कार्यालय बाजुरामा निशुल्क दिनु पर्ने ७० प्रकारका औषधि भित्र चाहिने डिस्पोजेबल सिरिञ्ज, आइरन चक्की, सिटामोल पनि हो ।

यस अघिका वर्षहरूमा साउन १५ सम्ममा औषधि खरीद टेण्डर प्रक्रियामा गैसक्थ्यो अहिले माथिबाट कुनै प्रक्रिया नभएको र सबै जिम्मा स्थानीय तहहरूलाई दिइएकाले टेण्डर प्रक्रिया नै सुरू नभएको कुँवरले बताए ।

'अघिल्लो अर्थिक वर्षको पैसाले केही मात्रामा औषधि किनेका छौँ । ठाउँठाउँमा पुर्‍याउन भौगोलिक विकटताको कारणले समस्या भएको छ ।'-जिल्ला स्वास्थ्य कार्यालयका प्रमुख रूपचन्द्र बिकले भने ।

अब पनि औषधि किन्ने प्रक्रिया सुरू नगरे औषधिको चरम अभाव हुने जिल्ला स्वास्थ्य कार्यालयका कार्यालय प्रमुख बिकले जानकारी दिए ।

नेपाल सरकारले निशुल्क रूपमा जिल्ला अस्पतालबाट ७०, प्राथमिक स्वास्थ्य केन्द्रबाट ५८ र स्वास्थ्य चौकीबाट ४५ किसिमका औषधिहरू बिरामीलाई उपलब्ध गराउनु पर्ने ब्यवस्था छ ।

यो भन्दा पहिले ७० प्रतिशत मन्त्रालयले, १० प्रतिशत क्षेत्रीय स्वास्थ्य निर्देशनालयले र २० प्रतिशत जिल्ला स्वास्थ्य कार्यालयले खरिद प्रक्रिया अगाडि बढाउँथ्यो । अहिले २० प्रतिशत स्थानीय तहहरूले खरिद गर्ने व्यवस्था रहेको अधिकृत रमेश कुँवरले बताए ।


पदम सिंह