समाचारहरू

बहुविवाह मुद्दाका आरोपित नारायण नपा-५ राजीगाउँका २१ वर्षीय अर्जुन सार्की र सोही ठाउँकी २१ वर्षीया रत्ना दर्लामी मगरलाई अदालतमा मुद्दा पेश भएकै दिन अदालतले कात्तिक १२ गते जनही १ वर्ष ६ महिना कैदको फैसला गरेको छ । साथै अदालतले प्रतिव्यक्ति १० हजार रुपियाँ क्षतिपूर्ति भराउनसमेत आदेश दिएको छ ।

अर्जुनकी जेठी पत्नी २१ वर्षीया सुनिता सार्कीको जाहेरीका आधारमा प्रहरी अनुसन्धान र सरकारी वकिल कार्यालयले कात्तिक १२ गते पेश गरेको मुद्दामा आरोपितद्वयले बहुविवाह गरेको स्वीकार गरेकोले न्यायाधीश प्रकाशप्रसाद पण्डितको इजलासबाट सो सजायको फैसला भएको जिल्ला अदालतले जनाएको छ ।

आरोपित समेतले स्वीकार गरेको कारण अदालतको शीघ्र न्याय प्रदान गर्ने नीति अनुरुप अदालतमा मुद्दा पेश भएकै दिन फैसला भएको जिल्ला अदालतका श्रेस्तेदार रमेश श्रेष्ठले जानकारी दिए । प्रमाण पुगेको अवस्थामा मुद्दा फैसला गर्ने शीघ्र न्याय नीतिले सरकारको खर्चमा समेत मितव्ययी हुने उनले बताए ।

अर्जुन र रत्नाबीच असोज १३ गते बहुविवाह भएको भन्दै जठी पत्नी सुनिताले असोज १८ गते जिल्ला प्रहरी कार्यालयमा जाहेरी दिएकी थिइन् । बहुविवाह घटनाका आरोपित अर्जुन र रत्नालाई प्रहरीले असोज १८ गते गिरफ्तार गरेको जिल्ला प्रहरी कार्यालयका इन्स्पेक्टर भुवनेश्वर प्रसाद यादवले जानकारी दिए ।

अमर सुनार