समाचारहरू

छिन्नमस्ता गाविस-३ गोबिन्दपुरकी २४ वर्षीया फतमा खातुनका पति २५ वर्षीय अफजल मियाँ र उनकी कान्छी पत्नी २१ वर्षीया हमीदा खातुनलाई प्रहरीले बहुविवाहको आरोपमा पुस २९ गते गिरफ्तार गरेको छ ।

पीडित महिलाले आरोपितहरूविरुद्ध जिल्ला प्रहरी कार्यालयमा दिएको उजुरी पुस २८ गते दर्ता गरी आरोपितहरूलाई गिरफ्तार गरेको जिल्ला प्रहरी कार्यालयका इन्स्पेक्टर नारायणप्रसाद भट्टर्राईले जानकारी दिए । आरोपित अफजलले मोरङ रंगेली-१ की हमीदासँग ०७३ पुस २२ गते विवाह गरेको थाहा पाएपछि बहुविवाहमा कारबाही गर्न माग गर्दै उजुरी दिएको पीडित महिलाले बताइन् ।

यसैबिच बहुविवाहको आरोपमा गिरफ्तार प्रसवनी गाविस-२ का ३४ वर्षीय परशुराम साह तेलीलाई जिल्ला अदालतले पुस २९ गते ३० हजार धरौटी लिई तारेखमा रिहा गरेको छ । अर्का आरोपित उनकी कान्छी पत्नी १९ वर्षीया आशाकुमारी साहलाई भने अदालतले साधारण तारेखमा रिहा गरेको स्रेस्तेदार नरेन्द्रकुमार श्रेष्ठले जानकारी दिए ।

२७ वर्षीया कविता साहको उजुरीमा जिल्ला प्रहरी कार्यालयले बहुविवाहको आरोपमा पुस १४ गते आरोपितहरूलाई गिरफ्तार गरेको थियो ।

मनोहरकुमार पोखरेल