बहुविवाह घटनाका आरोपितविरुद्ध प्रहरीमा उजुरी, मिलापत्र गराउने प्रयास

हगाम गाविस-९ याङ्लाकोटकी २३ वर्षीया माइली तामाङले प्रहरी समक्ष २६ वर्षीय पति जगमान तामाङ र पर्सा जिल्ला ठोरी निर्मलवस्ती घर भएकी १९ वर्षीया सोङमायाँ तामाङविरुद्ध उजुरी परेपनि मिलापत्र गराउने प्रयास भइरहेको आरोप छ ।

पीडित महिलाले १ लाख रुपियाँ पीडितलाई दिएर मङ्सिर १ गते जिल्ला प्रहरी कार्यालयमा मिलापत्र गराउने प्रयास गरिएको आरोप लगाइन् ।

पीडित महिलाले दिएको उजुरीमा आरोपितद्वयबिच असोज ५ गते विवाह गरेको आरोप लगाइएको छ ।

पीडित माइलीले कात्तिक २८ गते बहुविवाहका आरोपितद्वयविरुद्ध इलाका प्रहरी कार्यालय जलबिरेमा निवेदन दिएकी थिइन् । पीडितको निवेदनको आधारमा प्रहरीले कात्तिक २९ गते आरोपितद्वयलाई गिरफ्तार गरेको थियो ।

पीडितले जिल्ला प्रहरी कार्यालयमा जाहेरी पत्र दर्ता नगराएको र आरोपित र पीडितबीच अदालतबाट सम्बन्ध विच्छेद गर्ने सहमति भएकोले आरोपितलाई उनका दाजु सार्की तामाङको जिम्मा लगाएर पठाउने तयारी भएको जिल्ला प्रहरी कार्यालय स्थित महिला तथा बालवालिका सेवा केन्द्रका प्रमुख विशेश्वर पाण्डेले बताए । पाण्डेका अनुसार पीडितको तीन वर्षीया छोरीको जन्म दर्ता गराउने र पीडितलाई आरोपितले १ लाख रुपियाँ दिएर सम्बन्ध बिच्छेद गर्ने सहमति भएको हो ।

जिल्ला प्रहरी कार्यालयका इन्स्पेक्टर केदार बस्नेतसँग घटनाबारे थप जानकारी लिन खोज्दा कार्यालय प्रमुख एसपी बाहिर गएकाले उहाँ आएपछि मात्र निर्णय हुने बताए ।


नातिबावु धिताल