समाचारहरू

बहुविवाह गरेको आरोपमा तारिखमा छुटेका चिसापानी गाविस-५ का २८ वर्षीय दुर्गाप्रसाद भट्टराईलाई जिल्ला अदालतले एक वर्षकैद र पाँच हजार रुपियाँ जरिबानाको फैसला सुनाएको छ ।

न्यायाधीश नवराज दाहालको इजलासले भदौ ८ गते विवाहवारी महलको नौ नम्बर अनुसार कसुर ठहर गर्दै सोही महलको दश नम्बर बमोजिम उक्त फैसला सुनाएको अदालतका श्रेस्तेदार जगदीश्वर भट्टराईले जानकारी दिए ।

भट्टराईले नुवाकोट जिल्ला घर भएकी २७ वर्षीया शान्ता तामाङसँग जेठ २० गते बहुविवाह गरेको आरोपमा उनकी जेठी पत्नी गोमादेवी भट्टराईले असार ६ गते जिल्ला प्रहरी कार्यालयमा उजुरी दिएकी थिइन् ।

भट्टराईले सम्झनालाई झुक्याएर विवाह गरेको पाइएपछि अदालतले सम्झनालाई भने सफाई दिएको श्रेस्तेदार भट्टराईले जानकारी दिए ।

असार ६ गते दुर्गाप्रसाद र शान्ता दुवैलाई अदालतले असार २८ गते साधारण तारेखमा रिहा गरेको थियो ।

कोकिला ढकाल