बलात्कार र आपराधिक लाभ घटनाको मुद्दा मुल्तबीमा

  ०८० फागुन ११ गते

२८ वर्षीया महिलालाई बलात्कार र ठगी गरेको आरोप लागेका डाक्नेश्वरी नगरपालिका–९ पत्थरगाढाका ३२ वर्षीय पशुपति कुमार साह विरुद्धको बलात्कार र आपराधिक लाभको मुद्दा ०८० फागुन १० गते मुल्तबीमा राख्ने फैसला भएको छ ।

सप्तरी जिल्ला अदालतका न्यायाधीश संजिब पोखरेलको इजलासबाट मुद्दा मुल्तबीमा राख्ने फैसला भएको अदालतले जानकारी दिएको छ । उच्च अदालत जनकपुर राजविराज इजलासको परमादेशबाट ०७९ असार ५ गते उजुरी दर्ता भएको थियो । सुरुमा जिल्ला प्रहरी कार्यालयले उजुरी दर्ता नगरेपछि पीडितले ०७८ असोज ५ गते उच्च अदालत जनकपुर राजविराज इजलास समक्ष परमादेशको निवेदन दिनु भएको थियो । अदालतले ०७९ वैशाख ९ गते परमादेश गरी ०७९ जेठ १३ गते कानुन बमोजिम आवश्यक कारवाही गर्न प्रहरीलाई पत्र पठाएको थियो । पीडितले ०७९ जेठ ३१ गते उजुरी सनाखतको दर्ता गर्न माँग गर्दै उजुरी दिनुभएको थियो । आरोपित गिरफ्तार नभए पछि अदालतले पाँचौ पेशीमा मुद्दा मुल्तबीमा राखेको हो ।

घटना अनुसार पीडितका पति २०७२ सालदेखि ०७७ सालसम्म वैदेशिक रोजगारका लागि मलेशियामा कार्यरत थिए । डाक्नेश्वरी नगरपालिका–९ पत्थरगाढा महुकीस्थित आरोपितको पशुपति जनरल स्टोर्स किराना पसलमा सामान किन्न जाँदा ०७६ फागुन १० गते आरोपितले चिनीको बोरा उठाउन सहयोग माग्दै भित्री कोठामा लगी बलात्कार गरेको पीडितले बताइन् । पीडितका अनुसार प्रतिकार गर्दै होहल्ला गर्दा आरोपितले मोबाइलबाट खिचेको घटनाको भिडिओ सार्वजनिक गर्ने धम्की दिए । भिडिओ सार्वजनिक गर्ने धम्की र दवाव दिई घटनाको केही दिनमा ब्लैकमेल गरी २ लाख रुपियाँ लिएका आरोपितले ०७७ वैशाख २१ गते ६ लाख रुपियाँ र ०७७ असोज २६ गते पुनः २ लाख रुपियाँ गरी १० लाख रुपियाँ ठगेको बताउनु भयो ।

विदेशबाट आएका पतिले रकमको खाेजी गरेपछि आरोपितको किराना पसलमा माग्न जाँदा पछिल्लो पटक ०७८ वैशाख ५ गते पुनः बलात्कार गरेको पीडितले बताइन् । घटना बारे ०७८ वैशाख १० गते उजुरी दिएपछि पीडितको गजेन्द्रनारायण सिंह अस्पतालमा वैशाख १२ गते स्वास्थ्य परीक्षण भएको थियो । उच्च अदालत जनकपुर राजविराजको इजलासबाट भएको परमादेश पछि जिल्ला प्रहरी कार्यालयमा उजुरी दर्ता भई ०८० वैशाख २७ गते अदालतमा अभियोग पत्र दायर भएको थियो ।


मनोहरकुमार पोखरेल