समाचारहरू

१६ वर्षीया बालिकालाई बलात्कार गरेको आरोपमा पुर्पक्षका लागि थुनामा रहेका गल्छी गाउँपालिका–८ का २९ वर्षीय दिपक तामाङलाई जिल्ला अदालतको मङ्सिर ५ गतेको इजलासले जबरजस्ती करणी मुद्दालाई बालविवाहमा परिणत गरी १ वर्ष ६ महिना कैदको आदेश गरेको छ ।

न्यायधिस गोपालप्रसाद बास्तोलाको इजलासले जबरजस्ती करणी मुद्दालाई बालविवाहमा परिणत गरी कसुर ठहर गर्दै कसुरदारलाई मुलुकी अपराध संहिता २०७४ दफा १७३ को उपदफा १ बमोजिम १ वर्ष ६ महिना कैद गरी १५ हजार रुपियाँ जरिबाना गर्ने फैसला गरेको जिल्ला अदालतका श्रेस्तेदार माधव भण्डारीले बताउनु भयो ।

पीडित बालिकालाई ०८१ वैशाख १३ र १४ गते बलात्कार गरेको आरोपमा पीडित पक्षले वैशाख २९ गते जिल्ला प्रहरी कार्यालय धादिङमा उजुरी दिएपछि सोही दिन प्रहरीले आरोपितलाई गिरफ्तार गरेको थियो ।

प्रहरी अनुसन्धानपछि जेठ २० गते जिल्ला सरकारी वकिल कार्यालयमार्फत जिल्ला अदालतमा मुलुकी अपराध संहिता २०७४ दफा २१९ को उपदफा ३ (ख) अनुसार जबरजस्ती करणी मुद्दा  दर्ता गरिएको थियो ।

सोही मुद्दामा जिल्ला अदालतका न्यायाधीश गोपालप्रसाद बास्तोलाको जेठ २१ गतेको इजलासले आरोपितलाई पुर्पक्षका लागि थुनामा पठाएको थियो । पीडित बालिकाको स्वास्थ्य परीक्षण वैशाख २९ गते धादिङ अस्पतालमा गरिएको थियो ।

जिल्ला अदालतले गरेको फैसलामा ०८१ वैशाख १९ गते साथीको घरमा गएकी पीडित बालिकाले कसुरदारसँग विवाह गरेकाले र फोटोसमेत विवाहको भएको तथा बालिका वयस्कतर्फ उन्मुख भएकोले बलात्कार नभइ बालविवाह भएको ठहर गरेको श्रेस्तेदार भण्डारीले जानकारी दिनु भयो ।

सीताराम अधिकारी