समाचारहरू

३४ वर्षीया महिलालाई बलात्कार प्रयास गरेको कसुरमा जिल्ला अदालतले सुनवर्षी नगरपालिका-४ का ६४ वर्षीय माल्दाई भनिने नारायणबहादुर रायालाई ३ वर्ष ६ महिना कैद सजायको फैसला गरेको छ ।

जिल्ला अदालतका न्यायाधीश उद्धवप्रसाद भट्टराईको ०८१ भदौ ६ गतेको आदेशले कसुर गरेको ठहर गर्दै कैद सजायको फैसला आदेश भएको अदालतका सूचना अधिकारी हेमबहादुर बुढाथोकीले बताउनु भयो ।

पीडित महिलालाई ०८० साउन ८ गते बलात्कार प्रयास गरेको आरोपमा पीडित पक्षले आरोपितविरूद्ध ०८० साउन ९ गते इलाका प्रहरी कार्यालय, रङ्गेलीमा उजुरी दिएको थियो ।

पीडित पक्षको उजुरीका आधारमा आरोपितलाई प्रहरीले साउन ९ गते गिरफ्तार गरी जिल्ला अदालतमा ०८० भदौ ३१ गते बलात्कार प्रयास शीर्षकमा मुद्दा दर्ता गरेको थियो ।

जिल्ला अदालतका तत्कालीन न्यायाधीश मोहन सुवेदीको ०८० असोज १ गतेको इजलासले १ लाख रुपियाँ धरौटी माग गरेको थियो । आरोपित सोही दिन धरौटी बुझाएर रिहा भएका थिए ।

पीडितको स्वास्थ्य परीक्षण कोशी अस्पतालमा ०८० साउन ९ गते गरिएको थियो ।

विनोद सुवेदी