बलात्कार पीडित बालिकालाई इन्सेकद्वारा आर्थिक सहयोग प्रदान

  २०८० फागुन ४

सात वर्षीया बलात्कार पीडित बालिकालाई कानुनी प्रकृयामा जानका लागि अनौपचारिक क्षेत्र सेवा केन्द्र (इन्सेक) लुम्बिनी प्रदेश कार्यालयले आर्थिक सहयोग प्रदान गरेको छ ।
पीडितको घरको आर्थिक अवस्था कमजोर भएका कारण कानुनी प्रकृयामा जान समस्या परेको भन्दै पीडितका आफन्तले सहयोगका लागि फागुन २ गते इन्सेक जिल्ला प्रतिनिधिलाई निवेदन दिनु भएको थियो ।
पीडित पक्षको निवेदन र इन्सेक अर्घाखाँची जिल्ला प्रतिनिधि कूलबहादुर नेपालीको सिफारिसमा पीडितलाई १० हजार रूपियाँ सहयोग प्रदान गरिएको हो ।
पीडितलाई आरोपितले ०८० कात्तिक २४ गते बलात्कार गरेको भन्दै पीडित पक्षले ०८० पुस २५ गते जिल्ला प्रहरी कार्यालयमा उजुरी दिएका थिए । पीडितको स्वास्थ्य परीक्षण पुस २५ गते अर्घाखाँची अस्पताल सन्धिखर्कमा भएको थियो ।
पीडितको आर्थिक अवस्था कमजोर रहेकोले पीडितलाई कानुनी प्रकृयाका लागि न्यायिक निकायमा जान आउन र आवश्यक खर्चमा सहयोग पुर्याउने  उद्देश्यले फागुन ४ गते रकम हस्तान्तरण गर्नु भएको थियो ।


कूलबहादुर नेपाली