बलात्कार पीडितको उपचारमा इन्सेकको सहयोग

  ०७८ असार १६ गते

बलात्कार पीडित चार वर्षीया बालिकाको उपचारका लागि अनौपचारिक क्षेत्र सेवा केन्द्र (इन्सेक) नेपालगञ्जले असार १५ गते १० हजार रुपियाँ सहयोग प्रदान गरेको छ ।

बलात्कार घटनाबाट पीडित बालिकाको स्वास्थ्यमा समस्या आएपछि जिल्ला प्रहरी कार्यालयको सिफारिसमा इन्सेकले सहयोग गरेको हो ।

पीडितलाई जेठ २४ गते आरोपितद्वय घोराही उप–महानगरपालिका–१३ का २७ वर्षीय गोविन्द विक र २१ वर्षीय कृष्ण खत्रीले सामूहिक बलात्कार गरेको भन्दै पीडितपक्षले जिल्ला प्रहरी कार्यालयमा जेठ २७ गते उजुरी दिएका थिए ।

आरोपितद्वयलाई प्रहरीले जेठ २७ गते गिरफ्तार गरेर कारबाही प्रक्रिया अगाडि बढाएको जिल्ला प्रहरी कार्यालय दाङका डिएसपी मुकुन्द रिजालले बताउनु भयो ।

पीडितको उपचार र स्वास्थ्य परीक्षण जेठ २७ गते  एकद्वार सङ्कट व्यवस्थापन केन्द्रमा गरिएको पीडितकी आमाले बताउनु भयो ।

सहयोग रकम इन्सेक जिल्ला प्रतिनिधि जयनारायण पुनले हस्तान्तरण गर्नु भएको थियो । सहयोग रकम बुझ्दै पीडितकी आमाले इन्सेकले गरेको सहयोगले न्यायिक प्रक्रियामा जान सहज हुने बताउनु भयो ।


जयनारायण पुन